Sekretáriu Estadu ba Formasaun Profisionál no Empregu Julião da Silva, Imajen/Egas Cristovão

DILI, 17 jullu 2019 ( TATOLI)-Sekretáriu Estadu Formasaun Profisionál no Empregu (SEFOPE), Julião da Silva, husu ba joven sira tenke hakbesik aan ona bá sentru formasaun sira ne’ebé akreditadu hodi tuir formasaun atubele hasa’e abilidade.

Governante ne’e dehan, projetu greater sunrise ka projetu tasi-mane ne’ebé atu dada kadoras mai ne’e, nu’udar grande projeto iha nasaun no sei absorve traballadór rihun ba rihun.

“Tanba ne’e, timoroan tenke hakbesik aan ba sentru formasaun sira, se lae sira ne’ebé lakohi tuir formasaun, sei nafatin prejudika, sai haree na’in (penonton)”, Julião dehan iha Parlamentu Nasionál, ohin.

Nune’e, nia kontinua husu timoroan tenke hakbesik nafatin ba iha sentru formasaun hodi eleva koñesimentu.

“Favór ida, joven sira hakbesik bá sentru formasaun ne’ebé maka akreditadu hodi tuir kursu, se lakohi susar”, nia husu.

Governante nee haktuir,   SEFOPE sei oferese no prioritiza nafatin área sira ne’ebe maka hanesan ospitalidade no seluk tan.

Hatán sobre saida maka SEPFOPE sei halo nune’e kontinua tulun joven sira iha área formasaun profisionál, Julião hatete tinan ne’e nia laran, iha setembru, ekipa SEFOPE sei hala’o vizita ida bá iha ajénsia internasionál OPITO.

“Para halo negosiasaun hodi halo akordu ida depois sira bele mai atu halo formasaun ida ba ita nian formandu sira, atu nunee forma ita-nia ema sira tuir padraun oil and gas ka tuir certification oil and gas qualification standar “, dehan governante ne’e.

Tanba ne’e, ekipa SEFOPE ne’ebe lideradu husi Sekretáriu Estadu sei dezloka bá nasaun hanesan Malázsia, Sigapura no Inglaterra, iha setembru, atu haree posibilidade sira ne’e.

Jornalista: Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here