Matebian João Bosco Batista Colo Batan

DILI, 17 jullu 2019 (TATOLI)—Oras ne’e dadaun, família koordena ona ho Embaixadór Timor Leste iha Indonézia atu lori mate isin João Bosco Batista Colo Batan, ne’ebé ema deskoñesidu oho iha Jogyakarta, Indonézia, foin lalais ne’e.

Constâncio Suni hanesan aman hosi matebian ba TATOLI via telefone, ohin, hateten, oras ne’e dadaun, mate isin Bosco iha hela Ospitál Byayangkara Jogyakarta no tuir planu ohin tuku rua lorokraik oras Indonézia nian, Embaixadór Timor-Leste iha indonézia, Alberto Carlos sei hasoru malu ho superiór Polísia Yogyakarta nian, atu bele simu mate isin.

Tuir planu, loron 18 fulan ne’e, mate isin sei to’o Timor no família koordena ona ho Embaixada Timor-Leste iha Indonézia atu transporta mate isin ho rute aviaun Jogyakarta-Surabaya-Kupang-Oé-Cusse.

João Bosco Batista Colo Batan, ho naran bolu Bosco hosi Aldeia Masin, Suku Costa, Sub-rejiaun Pante Makassar, Rejiaun Administrativa Espesiál Oé-Cusse Ambeno (RAEOA), lakon iha Jogya iha loron 2 fulan ne’e.

Constâncio husu Governu Timor-Leste atu aselera prosesu ne’e tanba Bosco hetan protesaun ho Lei Indonézia nian, iha ne’ebé nia ba eskola la’ós ilegál, maibé uza viza, pasaporte no seluk-tan. Família mós ezije ba Governu Timor-Leste ho Indonézia atu serbisu hamutuk hodi buka autór sira no tenke kaptura atu prosesa tuir lei.

Nia haktuir, durante loron hirak nia laran, família la fiar kona-ba informasaun sira ne’ebé espalla iha mídia sosiál kona-ba Bosco nia mate.

Nia esplika, família foin fiar, hafoin hetan kontatu ho Bosco nia tiun ne’ebé akompaña prosesu investigasaun no autópsia iha Jogyakarta, ne’ebé iha horisehik lorokraik, konfirmadu katak ida ne’e Bosco nia mate isin.

Constâncio konta katak, tuir kultura Atoni, kazu sira hanesan ne’e tenke halo uluk serimónia rituál, atu hetan klareza. Tanba ne’e, iha horisehik, família mós halo ona serimónia rituál, hodi husu matebian atu bele ko’alia liafuan ruma (m’batu-sigla Baikenu) liuhusi ema ne’ebé iha relasaun ran, hanesan inan rasik, tian ka aman.

Iha serimónia rituál ne’e, matebian konsege ko’alia liuhusi ninia tian katak, ‘‘mate isin ne’e ha’u duni, durante loron hirak ne’e ha’u labele ko’alia tanba ema tesi tiha ha’u nia nanál, ko’alia ladi’ak,” Constâncio konta tuir.

Nia haktuir liu-tan, reprezentante família iha Jogyakarta ho naran Francisco Poto fó ona informasaun katak nia akompaña prosesu investigasaun to’o hotu inklui liman fatin (sidik jari) no iha doutór na’in 11 mak deklara katak mate isin ne’e ho naran João Bosco Batista Colo Batan.

Tuir observasaun família katak situasaun ne’e akontese bebeik no sei kontinua akontese tanba estadu rua la sériu hodi rezolve.

Aleinde ne’e, João Meko hanesan advogadu hosi família via WhatsApp hateten, mate isin ne’ebé komunidade iha área Magetan, Java Leste, hetan ona. Polísia Indonézia identifika katak ne’e estudante timoroan.

Advogadu ne’e ema Indonézia ne’ebé durante ne’e família matebian husu atu akompaña prosesu refere iha Jorgjakarta, Indonézia.

Bosco iha Jogja hela iha Jalan Maguwo 0, Banguntapan, Bantul, rumah 161, RT 24 no eskola iha Sekolah Tinggi Teknik Adisucipto (STTA) Jogyakarta, Departemen Tenkik Industri Penerbangan, Semestre 2, no tuir planu iha loron 17 fulan ne’e Bosco sei hala’o ezame semestre (TAS).

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here