Jerente ETO+, Edmundo Freitas Lopes. Foto TATOLI: Cancio Ximenes

DILI, 17 jullu 2019 (TATOLI)—Jerente ETO+, ohin, informa ETO+ TV koopera ho televizaun privadu Indosiar hala’o audisaun ba kontestante Dandgut Academy Asia-5 (DAA-5) hamutuk ema na’in 50 resin hodi hili reprezentante nasaun Timor-Leste na’in lima (5) atu bele ba tuir kompetisaun DAA-5 iha Jakarta-Indonézia iha fulan Outubru 2019.

“Audisaun ida ne’e, kontinuasaun kooperasaun Indosiar ho ETO+ la’o hahú husi DAA-2 (20016) no agora to’o ona iha DSA-5. Maibé tinan ida ne’e diferente ho tinan hirak liu ba. Tanba tinan ida ne’e, iha tan programa foun naran Golden Memories Asia 2019 ne’ebe kompetisaun múzika POP nian ba muzika tuan sira husi 1970-2000. Ohin ita halo audisaun ba kontestente DAA-5. Aban (kinta), ita sei halo audisaun ba kontestante Golden Memories,” informa Jerente ETO+, Edmundo Freitas Lopes, ba Ajénsia TATOLI liuhusi entrevista iha nia knaar fatin Fatuhada, Dili, kuarta (17/7/2019).

Nia hatutan, kontestante sira ne’ebé atu tuir Golden Memories Asia 2019, sira tenke lori múzika  tuan sira ne’e hodi lori kompete. Tanba ne’e, nia dehan, kontestante sira ne’ebe tuir ne’e mós tenke idade mínimu husi dade 30 ba leten. Artista timoroan sira ne’ebé atu kompete tenke iha album múzika no iha múzika single nomós ba timoroan sira ne’ebé la’os artista maibé sira-nia hoby kanta no hatene kanta.

“Iha tinan dahuluk (2019) ne’e iha nasun neen (6) mak sei kompete. Tinan kotuk ne’e, Filipina laiha maibé tinan ne’e Filipina mós tuir, entaun ita iha nasaun ne’en. Loloos nasaun hitu (7) maibé  Tailándia la tuir tanba kestaun língua la duun domina,” nia hateten.

Kontestante ba Golden Memories Asia 2019 husi ema na’in 30 resin ne’ebé eleitu ema na’un tolu (3) iha audisaun ba loron aban (kinta) nian, nia haktuir, tuir planu sei aranka ba Jakarta-Indonézia iha fulan agostu nia klaran (2019) ba tama ona karantina. Tanba, sira sei tuir kompetisaun loloos iha loron 1 fulan setembru tinan  2019.

Kona-ba ekipa juri, nia informa, tinan ida ne’e diferente ho tinan hirak liubá ne’ebé ekipa juri kompostu husi juri lokál ho juri husi Indosiar ninian. Maibé, tinan ida ne’e, juri husi Indosiar mesak. Timoroan sira ne’ebe sai kandidatu atu sai juri mak Enia Matos no Mitu Freitas mak asiste hela oinsa ekipa juri Indosiar fó audisaun ba kontestante no oinsa halo avaliasaun.

“Enia Matos ho Mitu Freitas ne’e ba kandidatu sai juri ka komentator ba DAA-5 iha Indosiar. Sira na’in rua orsida Indosiar mak hili depende ba sira-nia kritéria. Didinho, nafatin sai juri ba Timor-Leste. Ekipa juri husi Indosiar ne’ebé dadaun ne’e halo audisaun mak Ekin ho Linda. Kada tinan, sira-na’in rua ne’e mak sempre mai. Sira-na’in rua mak la’o hale’u Asia ne’e para ba hili talentu sira iha Asia ne’e, espesialmente ba eventu ida ne’e,” nia dehan.

Notísia relevante:

Timor-Leste Sei Tuir Kompetisaun “Golden Memories Asia 2019” Iha Indonézia

Jornalista: Cancio Ximenes

Editór: Rafy Belo

HAKEREK NO HATÁN

Please enter your comment!
Please enter your name here