Ministra Edukasaun, Juventude no Desportu, Dulce de Jesus Soares, ko'alia ho Vise-Ministru Edukasaun, Juventude no Desportu, João Zacarias Freitas Soares, iha sala enkontru Konsellu Ministru, kuarta, (21/9). Imajen António Goncalves

DILI, 17 jullu 2019 (TATOLI)—Ministra Edukasaun, Juventude no Desportu, Dulce de Jejus Soares, akompaña hosi Vise Ministru Edukasaun, Juventude no Desportu, João Zacarias Freitas Soares, hasoru malu ho Primeiru-Ministru, Taur Matan Ruak, hodi relata planu asaun ministériu ba tinan 2020.

“Ami koa’lia kona-ba asuntu planu asaun Ministériu Edukasaun Juventude no Desportu (MEJD) ba tinan 2020, ne’ebé konsentra liu-ba infraestrutura edukativa, ne’ebé tuir dadus iha 2020, MEJD iha planu atu harii eskola 100 resin. Eskola hirak ne’e mai ho komponente lima hanesan sala aula, sala ba profesór no administrasaun, kantina, biblioteka no laboratóriu,” tenik Ministra Dulce iha Palásiu Governu, kuarta ne’e.

Governante ne’e iha esperansa katak bele hetan orsamentu natón, nune’e bele konstrui sala aula sira ne’e tanba hanesan prioridade importante ba programa MEJD iha tinan 2020.

Biban hanesan, nia haktuir, halo mós diskusaun kona-ba merenda eskolár ne’ebé mak agora dadauk desentraliza ona iha Ministériu Administrasaun Estatal (MAE).

“Ami sei haree fila fali, karik iha futuru bele serbisu ho Ministériu Administrasaun Estatal, envez agora iha fó orsamentu no fós maibé karik iha maneira foun ne’ebé ami komesa elabora atu di’ak liu iha futuru,” nia akresenta.

Nia mós dehan tan, bele mós aproveita ai-han lokál ne’ebé mak Governu bele sosa. “Ami iha hanoin katak ba futuru atu fó de’it osan ba sira liuhosi transferénsia públika ruma hafoin eskola mak jere rasik,” nia katak tan.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here