Jurista Adelina Meluk Lobo. Imajen/Domingos Piedade Freitas

DILI, 17 jullu 2019 (TATOLI)– Jurista Adelina Meluk Lobo, apresia ho esforsu Estadu Timor Leste ne’ebé hala’o akompañamentu  pro-ativu tebes ba kazál timoroan lori droga ne’ebé detein hela iha sela Polisia Belu, Timor Osidentál (NTT-sigla Indonézia).

“Ha’u hanoin foin daudauk sorumutuk entre ita nia estadu liu husi Prokuradór Jerál Repúblika TL, José da Costa Ximenes ho Ministru Hukum dan HAM Indonézia, Yosonna Laoly, ko’alia uitoan mós kona ba Mutual Legal Assistance (MLA) atu koopera hamutuk hodi bele deskobre verdade di’ak liu tan ba kazu kazál lori droga,”  hateten Jurista Adelina Meluk Lobo, ba Ajénsia TATOLI, ohin, iha Tribunal Distritál Dili.

Jurista ne’e klarifika katak,  MLA hanesan meius kooperativu entre estadu ho estadu, nune’e foin daudauk Estadu TL mós halo ho nasaun Indonézia hodi haree ba prosesu kontinuasaun sira tuir mai.

Nia dehan, tanba konsidera kazál timoroan lori droga hanesan kurir/calo tanba iha ema balun mak haruka alias Filipino na’in rua ne’ebé agora iha hela prizaun preventiva ne’e mak hun no abut ka na’in husi droga ne’e. Tanba ne’e, nia husu ba Ministériu Públiku hanesan pilár importante  bele fó kontribuisaun makaas ba prosesu kazál lori droga.

Ho esperiénsia ida nee, Adelina Meluk Lobo, husu ba estadu TL presiza toma atensaun mós ba fasilidade no sistema sira iha fronteira atu minimiza risku  ba TL ninia imajen.

Jornalista : Domingos Piedade Freitas

Editór       : Francisco Simões

HAKEREK NO HATÁN

Please enter your comment!
Please enter your name here