Ministru Justisa Manuel Cárceres da Costa, Imajen/Egas Cristovão

DILI, 17 jullu 2019 (TATOLI)–Ministru Justisa, Manuel Cárceres da Costa hateten tanba Lei Orgánika Ministériu Justisa (MJ) promulgadu ona, iha tempu badak ministériu ne’e sei halo restruturasaun ba kargu xefia sira.

“Ha’u informa ba Primeiru-Ministru (PM) kona-ba Orgánika Ministériu Justisa ne’ebé promulga no publika ona iha Jornál Repúblika hanesan Dekretu-Lei nú 14/2019, 10 juñu. Ha’u mós informa ba Primeiru-Ministru katak hahú 1 agostu sei iha restruturasaun uituan iha kuadru sira iha Ministériu Justisa nia laran,” nia tenik iha Palásiu Governu hafoin relata serbisu ministériu ba Xefe Governu, kuarta ne’e.

Nia tenik, enkontru ohin ko’alia ho PM atu relata kona-ba dezenvolvimentu iha setór justisa ne’ebé mak nia asumi kna’ar hanesan Ministru Justisa durante tinan ida.

Governante ne’e akresenta, mezmu mosu restruturasaun maibé sei la troka ema ida. “Sei mosu diretór foun, xefe departementu foun, maibé en-jerál diretór sira ne’e la troka. Ba ha’u-nia diretór sira, ha’u iha prinsípiu katak diretór ne’e halo mudansa de’it hosi diresaun seluk ba diresaun seluk. Hosi diretór no xefe departementu sira mós hanesan,” nia katak.

Nia dehan tan: “Kle’ur demais iha fatin ida, ne’e ladi’ak. Tanba ne’e, tenke halo mudansa. Se nia diretór iha fatin ida entaun ba fali fatin foun para bele iha ambiente foun no hanoin foun”.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here