Reprezentante Espesiál Governu ba asuntu petróleu, Kay Rala Xanana Gusmão. Imajen Tatoli/Egas Cristóvão

DILI, 17 jullu 2019 (TATOLI)—Negosiadór Prinsipál ba Delimitasaun Fronteira Marítima, Kay Rala Xanana Gusmão, haktuir Fronteira Marítima entre Timor-Leste ho Austrália hetan solusaun la’ós manán iha Tribunál, maibé liuhosi konsiliasaun obrigatória ne’ebé forma hosi Organizasaun Nasaun Unida (ONU).

“Ita hetan solusaun liuhosi konsiliasaun obrigatória, la’ós iha Tribunál. Ita labele tama Tribunál tanba Austrália la rekoñese Tribunál nia kompeténsia,” tenik Xanana iha audisaun konjunta komisaun tolu Parlamentu Nasionál (PN) iha sala plenária, kuarta ne’e.

Xanana dehan, nia konsege invalide Tratadu Certain Maritime Arrangements in the Timor Sea (CMATS) ho Austrália, hafoin negosiasaun ba Fronteira Marítima liuhosi dalan amigável.

Nia haktuir, kazu disputa ne’e liuhosi Tribunál Arbitrajen Internasionál no Austrália rasik lakohi tuur hamutuk ho Timor-Leste hodi buka solusaun ba disputa Fronteira Marítima tanba Austrália la rekoñese Tribunál nia kompeténsia tanba retira hosi membru United Nation Convention on the Law of the Sea (UNCLOS) iha tinan 2002.

Xanana akresenta, Austrália hatene katak Timor-Leste ukun-án ona tanba ne’e retira lalais hosi UNCLOS, ho hanoin ida karik Timor-Leste levanta kazu fronteira labele kesi sira. Maibé, maski nune’e, Xanana uza nia estratéjia ho meiu oioin hodi bele tuur hamutuk ho Austrália.

Ba deputadu sira, nia haktuir, momentu ne’ebá Komisaun Konsiliasaun ne’ebé forma hosi ONU bandu maka’as parte rua labele ko’alia ba públiku kona-ba konfidensialidade iha prosesu diskusaun Fronteira Marítima, maibé to’o ikus hetan duni solusaun ba disputa entre parte rua.

“Iha konsiliasaun ne’e la’ós ko’alia de’it mak Fronteira Marítima, maibé haree buat hotu,” nia akresenta.

Ba tratadu entre Timor-Leste no Austrália, haree hotu akordu sira iha pasadu hanesan akordu ne’ebé halo ho Indonézia, akordu CMATS, kampu mina-matan iha Tasi Timor inklui Greater Sunrise no esplorasaun atividade petrolíferu ba futuru.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here