Xefe Estadu Maiór Jenerál F-FDTL, Lere Anan Timur hala’o enkontru semanál ho Prezidente Repúblika, Francisco Guterres Lú Olo, foin lalais ne’e. Imajen Tatoli/António Gonçalves

DILI, 17 jullu 2019 (TATOLI)—Enkontru regulár entre Xefe Estadu Maiór Jenerál FALINTIL-Forsa Defeza Timor-Leste (F-FDTL), Lere Anan Timur ho Prezidente Repúblika (PR), Francisco Guterres Lú Olo, kuarta ne’e, ko’alia kona-ba preparasaun Forsa Armada ba komemorasaun eventu boot tolu iha fulan oin.

Eventu boot tolu iha fulan oin mak hanesan komemorasaun loron FALINTIL iha 20 agostu, loron Konsulta Populár iha 30 Agostu no komemorasaun prezensa INTERFET iha Timor.

Hafoin enkontru, maski la temi detallada kona-ba prepasaun saida mak halo ona, maibé Lere hateten, fulan oin iha eventu tolu importante mak sei komemora tutuir malu, tanba ne’e Forsa Armada preparadu.

Kona-ba problema hosi grupu deskoñesidu ne’ebé kontinua halo krime iha rai laran, liliu iha sidade Dili, Lere hateten, parte defeza no seguransa sei haka’as-án atu koordena malu oinsá buka solusaun ne’ebé di’ak liu-ba asuntu ne’e.

Enkontru ne’ebé hala’o iha Palásiu Prezidente Nicolau Lobato, Bairu Pité, Dili, Lere Anan Timur, akompaña hosi Xefe Estadu-Maiór Koronel Calistro da Costa ‘Coliati’.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here