DILI, 17 jullu 2019 (TATOLI)Prezidente Konfederasaun Desportiva Timor-Leste (CDTL-sigla Portugés), Afrânio Xavier Amaral husu ba federasaun sira hotu iha Timor-Leste atu hatudu nafatin espíritu desportivu maski fasilidade ladún sufisiente.

“Hela de’it fulan lima ita atu ba partisipa iha eventu internasionál Sea Games, dormitóriu ba atleta sira mós seidauk iha. Realidade ita nian mak nune’e duni. Maibé, ita tenke buka meiu oinsá atu hala’o treinamentu nafatin no hatudu espíritu desportivu, nune’e bele reprezenta nasaun nia naran,” dehan Afrânio ba Agência Tatoli iha edifísiu CDTL, Caicoli, Dili, kuarta ne’e.

Nia dehan, labele ezije demais ba Governu tanba buat hotu tenke la’o tuir prosesu ne’ebé iha, tanba ne’e federasaun hotu bele buka meiu oinsá atu kontinua prepara-án nafatin.

Afrânio akresenta, preokupasaun hirak ne’ebé federasaun sira hato’o, Governu tau hela ona iha konsiderasaun, tanba ne’e buat hotu sei la’o tuir prosesu hafoin bele to’o iha ne’ebá.

Antes ne’e, federasaun barak mak husu ba Governu atu tau konsiderasaun ba preokupasaun hirak ne’ebé sira hasoru liliu fasilidade ba sira hodi hala’o treinamentu.

“Ita-nia nasaun foin mak ukun-án. Se buat ki’ik-bo’ot mak ita ezije de’it ba estadu, hanoin ladún di’ak. Maibé, atleta hirak ne’ebé atu ba partisipa iha Sea Games, agora ne’e preparadu hela. Sira sempre treinu loro-loron hosi modalidade hirak ne’e hotu,” tenik Afrânio.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here