Negosiadór Prinsipál, Xanana Gusmão ho ninia ekipa bainhira halo audisaun konjunta ho Komisaun B, C no D ho Governu, iha plenária Parlamentu Nasionál, tersa (16/7). Imajen Tatoli/Jogerjo Guterres

DILI, 17 jullu 2019 (TATOLI)—Negosiadór Prinsipál ba Delimitasaun Fronteira Marítima, Kay Rala Xanana Gusmão, hateten kompañia petrolífera ConocoPhillips, hakarak dada pipeline (kadoras) ba Darwin, Austrália.

“Momentu ne’ebá ha’u sei hanesan Primeiru-Ministru, ha’u dehan labele fó lisensa ba sira (ConocoPhillips) kona-ba esplorasaun petróliu iha Tasi Timor, tanba bainhira fó lisensa karik, ita ohin loron la hakilar malu iha Parlamentu. Tanba sira hakarak dada pipeline ba Austrália, maibé ita hakarak dada mai Timor-Leste,” tenik Xanana iha audisaun konjunta entre komisaun tolu ho Governu iha plenária Parlamentu Nasionál (PN), kuarta ne’e.

Maski nune’e, Xanana hatene intensaun ConocoPhillips nian kona-ba prosesu dezenvolvimentu Greater Sunrise. “Ami ko’alia ho ConocoPhillips iha Brisbane, Austrália, ha’u dehan nune’e, ita koñese malu kle’ur liu ona. Ita lalika ko’alia barak,” Xanana akresenta.

Nia dehan, povu Timor-Leste hein katak pipeline tenke dada mai Timor-Leste la’ós ba fatin seluk. “Sira dehan lori ba Darwin, ita hakarak lori mai Timor. Se dada ba ne’ebá (Darwin) ita lakohi,” haktuir Xanana.

Entretantu, iha tinan 2019 ne’e, ConocoPhillips fa’an asaun iha konsórsiu Greater Sunrise ba Timor-Leste ho kustu millaun $350 (ekivalente %30 hosi totál konsórsiu), ne’ebé kontratu partilla iha produsaun 03-19 no 03-20. Nunee mós Timor-Leste sosa tan asaun Shell Energy nian millaun $300 (%26,6).

Agora dadaun, konsórsiu iha Greater Sunrise hela de’it Woodside (operadora ho %33,4), Osaka Gás (%10), enkuantu Timor-Leste nia partisipasaun iha konsórsiu Greater Sunrise hamutuk %56,56).

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here