Koordenadór Komisaun Organizadora ba loron Konsulta Populár da-20, Hugo Maria Fernandes. Imajen Tatoli/Egas Cristóvão.

DILI, 17 jullu 2019 (TATOLI)–Atu komemora tinan 20 Konsulta Populár (30 agostu 1999-30 agostu 2019), Centro Nacional Chega (CNC)! I.P,  lansa ezebisaun prizaun no prizioneiru polítiku timoroan iha atuál eidfisiu CNC, eis Komarka Balide, Dili, kuarta (17/7).

Iha loron ne’e mós CNC selebra aniversáriu hafoin ofisialmente harii iha 17 jullu 2017 no lansa mós relatóriu finál Centro Nacional Chega! tinan 2018 nian, inklui inaugura Jardim da Memória a Esperança.

Prezidente Konsellu Administrasaun Centro Nacional Chega! I.P, Inês Maria de Almeida esplika, espoziaun  ne’e kona-ba istória Timor-Leste nian hahú hosi konflitu internu entre timoroan no ikus mai ho rezisténsia koletiva forte, determinada no únika iha mundu, ne’ebé hametin ho ida-idak nia brani hasoru dadur no terus durante tinan 24.

Nia hatutan, espozisaun ida ne’e halo parte ba selebrasaun aniversáriu referendu ba dala 20, komisaun organizadora fó kna’ar ba Centro Nacional Chega! atu haree programa no organiza espozisaun ida ne’e.

Tanba ne’e, CNC hahú prepara materiál ba memória koletiva, hahú hosi janeiru to’o agostu 1999.

Espozisaun ne’e fó hatene informasaun kona-ba oinsá dadur polítiku sira kontinua halo relasaun ho rede oioin rezisténsia nian.

Aleinde ne’e, fó onra no rekoñesimentu ba ema sira ne’ebé dadur  no terus iha dadur fatin Komarka Balide no fatin seluk tanba hetan moras oioin no mate ba kauza nasionál.

Espozisaun ne’e mós atu haki’ak memória kona-ba luta brani no determinadu ba jerasaun foun Timor-Leste nian, prezerva memória pasadu, nu’udar eransa ba harii no hametin espíritu solidariedade entre timoroan.

Nune’e mós, fó hatene  esperiénsia rekonsiliasaun ne’ebé Timor-Leste no Indonézia harii, hafoin konflitu durante tinan 24, nu’udar lisaun ba harii pás iha mundu.

Entretantu, Diretór Ezekutivu CNC, Hugo Maria Fernandes, hateten Antigu Komarka Balide nian hanesan fatin ne’ebe timoroan halo memória sai asesível ba públiku no hanoin katak bele apriende istória pasadu no kontinua fó apoiu ba sobrevivente sira.

Tanba ne’e, nia haklaken, parte CNC hein katak ezebisaun ida ne’e sei tulun duni timoroan sira hotu atu apriende hosi pasadu hodi harii prezente no futuru ne’ebé respeita direitu umanu.

Partisipa iha lansamentu ezebisaun ne’e, eis Prezidente Repúblika, José Manuel Ramos Horta, Prokuradór Jerál Repúblika, José da Costa Ximenes, membru Parlamentu balun,  Sekretáriu Estadu Komunikasaun Sosiál, Merício Juvenal dos Reis Akara, Provedora Direitu Umanu no Justisa, Jesuinha Gomes, eis prizioneiru sira, sosiedade sivíl, funsionáriu CNC, estudante no konvidadu sira seluk.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here