Suspeitu sira ne'ebé taa membru F-FDTL iha Pantai Kelapa, Estasaun Kombustivel Nagajor nia oin. Imajen/Domingos Piedade Freitas

DILI, 17 jullu  2019 (TATOLI)- Ministru Defeza no Ministru Interior Interinu, Filomeno da Paixão de Jesus, husu ba Komandu FALINTIL-Forsa Defeza Timor Leste (F-FDTL) ho Komandu Polisia Nasionál Timor Leste (PNTL) atu halo investigasaun kle’an hodi buka hatene razaun saida maka ema sivíl sira kontinua lori arma hakanek membru forsa rua ne’e.

Ministru Filomeno Paixão, lamenta ikus-ikus ne’e ema sivíl gosta tula liman ba forsa rua hodi koko atu hamonu imajen forsa Estadu Timor Leste nian.

“Ha’u preokupa taa F-FDTL inklui polisia. Rezultadu ida ne’e keta buat ruma mai husi kotuk karik, ita tenke buka hatene, tanba problema ne’e mosu kleur ona,” afirma Ministru Filomeno, ohin, ba jornalista iha Palásiu Governu.

Nia dehan, se ema sivíl brani halo krime hasoru forsa bele kauza husi problema privadu ka envolve iha grupu ilegál ruma.

“Keta halo nia envolve iha  grupu ilegál ka envolve iha krime organizadu ka polítika fo’er ruma husi kotuk bele kauza buat ne’e mosu,” nia  hatete.

Ministru mós apela ba Komandu PNTL no F-FDTL hametin liután kooperasaun hodi labele fó fatin ba ema sivíl tula liman, inklui halo krime hasoru forsa rua.

Husi sorin seluk, suspeitu na’in lima ho inisiál, DSC, NB, AC, LP no CB husi grupu ilegál ne’ebé envolve iha kazu taa kanek forsa Espesiál F-FDTL, Abílio Babo iha área Bebonuk, Dili, domingu kalan (14/07/2019), submete ona ba primeiru julgamentu interrogatóriu iha Tribunál Distritál Dili (TDD).

Iha loron 10 juñu 2019, ema deskoñesidu na’in rua mós taa kanek Ajente Polisia, Inácio de Carvlho (26)  iha área Eskola 30 Agusto, Aldeia Ain Fuik, Suku Madohi, Postu Administrativu Don Aleixo, Munisípiu Dili hodi rezulta vítima nia kotuk laran kanek maka’as.

Kazu ne’e rasik too agora PNTL seidauk deteta paradeiru no seidauk kaptura  autór sira ne’ebé envolve iha  krime ne’e.

Jornalista : Eugénio Pereira  

Editór       : Francisco Simões

HAKEREK NO HATÁN

Please enter your comment!
Please enter your name here