Ministru Justisa, Manuel Cárceres da Costa. Imajen/Egas Cristovão

DILI, 17 jullu 2019 (TATOLI)—Prezidente Konsellu Koordenasaun Justisa (KKJ) atuál Ministru Justisa, Manuel Cárceres da Costa informa, aban (18/7), KKJ sei hala’o enkontru ida hodi finaliza ezbosu Lei Organizasaun Judisiária molok aprezenta ba Konsellu Ministru (KM).

“Ezbosu ba Lei Organizasaun Judisiária ami prepara ona no aban (kinta), Konsellu Koordenasaun ba Justisa ne’ebé mak kompostu hosi Ministru Justisa, Prezidente Tribunál Rekursu, Prokuradór Jerál Repúblika, Defensór Públiku Jerál sei túr hamutuk hodi finaliza ona ezbosu Lei Organizasaun Judisiária, para bele hato’o iha Konsellu Ministru no hetan aprovasaun,” tenik Cárceres iha Palásiu Governu, hafoin relata serbisu ministériu ba Primeiru-Ministru (PM), Taur Matan Ruak, kuarta ne’e.

Nia hatutan, hafoin hetan aprovasaun iha KM mak bele hasa’e ba Parlamentu Nasionál (PN) hodi bele fó apresiasaun no aprova hodi haruka ba Prezidente Repúblika, Francisco Guterres Lú Olo atu promulga.

Tuir governante ne’e, Lei Organizasaun Judisiária nia kontempla ona saida mak ministériu relevante hanoin ba oin.

“Ezemplu, agora, ita iha instánsia rua de’it, Tribunál Distritál no Tribunál Rekursu, maibé kuandu hamosu Lei Organizasaun Judisiária iha ona dalan para ita atu kria Supremu Tribunál Justisa no bele kria tan Tribunál Superiór Administrativu, para depois litíjiu rekursu potensiozu sira no prestadu sira kontra estadu ka membru Governu sira, Tribunál Superiór Administrativu sira bele rezolve,” nia katak.

Nune’e mós, nia dehan, liuhosi Lei Organizasaun Judisiária, bele kria Tribunal das Contas (TdC), tanba agora dadauk Timor-Leste iha de’it Câmara das Contas (CdC) hanesan seksaun ida hosi Tribunál Rekursu.

“Kuandu ita iha ona Lei Organizasaun Judisiária, ita bele harii Tribunál sira, depois ko’alia oinsá mak ita halo alargamentu mapa judisiáriu iha Timor-Leste, ita bele kria Tribunál sira. Ezemplu, agora ita iha Tribunál Distritál iha Díli, Oé-Cusse, Suai no Baucau. Oinsá mak ita bele kria tan Tribunál iha munisípiu seluk,” nia esplika.

Maski nune’e, nia konsidera, bainhira atu kria Tribunál sira iha munisípiu seluk no kria Supremu Tribunál Justisa, TdC, Tribunál Supremu Administrativu, tenke foku mós ba formasaun kuadru judisiáriu sira. 

Sei Harii Sentru judisiária

Iha oportunidade ida ne’e, Ministru Cárceres informa ba Xefe Governu katak bainhira atu reforma setór justisa tenke iha meiu hodi suporta.

“Ha’u informa reforma dahuluk ne’ebé sei halo mak Sentru Formasaun Judisiária, Dekretu-Lei ne’ebé uluk regula Sentru Formasaun ne’e iha ona proposta Dekretu-Lei foun revizaun ida para depois reforma tiha kurríkulu iha Sentru Formasaun Jurídika Judisiária ne’e, para iha setembru ka outubru 2019 ita komesa hahú VI kursu ba formasaun majistradu sira,” nia subliña.

Governante ne’e informa tan, kursu ne’e sei fó oportunidade ba timoroan na’in 45 para ba hasai kursu juíz, prokuradór no defensór públiku iha Sentru Formasaun Judisiária Caicoli.

“Agora ita iha juíz limitadu tebes (hamutuk 20 resin de’it) no prokuradór 20 resin. Tanba ne’e, oinsá ita bele forma maluk timoroan sira para abanbain rua sai juíz, prokuradór, defensór públiku no ofisiál justisa,” nia akresenta.

Tuir Cárceres, ida ne’e hanesan parte ida hosi kuadru dezenvolvimentu institusionál. “Tinan ida ne’e, ita rekruta ema na’in 45 iha Sentru Formasaun Judisiária iha Caicoli no tinan oin ita komesa haruka sira ba Portugal no Brazíl. Ba Brazil atu hasai kursu defensór públiku no ba Portugal hodi tuir kursu sai juíz no prokuradór,” nia informa.

Ministru dehan tan, aleinde haruka hala’o estudu iha rai li’ur, MJ iha hanoin atu juíz, prokuradór, defensór ida agora presiza mós hasa’e kapasidade intelektuál, tanba ne’e sira sei hasai kursu espesializasaun.

Jornalista: Julia Chatarina

Editór: Xisto Freitas

 

HAKEREK NO HATÁN

Please enter your comment!
Please enter your name here