Logo UNTL.

DILI, 16 jullu 2019 (TATOLI)-UNTL liuhusi Fakuldade Medisina, Siénsia no Saúde (FMSS) iha ona planu atu loke ospitál atu responde ba publiku, sai nu’udar laboratóriu ida para estudante sira prátika direita.

“Tanba ne’e mak UNTL nia planu estratéjika para ba oin ne’e iha dezenvolvimentu ba iha área Fakuldade Medisina no Siénsia Saúde  no la´ós área ida ne’ebé atu husik hela maibé neneik ba  bebeik sei realiza,” hateten Pró-reitór, Universidade Nasionál Timor Lorosa´e (UNTL), Eduardo Aniceto Serrão, bainhira partisipa semináriu kona-ba: Tinan 25 Iha Kareira Médika Serbi Ema Moras, Povu No Nasaun, iha salaun CNE (Komisaun Nasionál Eleisaun-sigla portugés), Kolmera, Dili, tersa (16/07/2019).

Pró-reitór UNTL (Universidade Nasionál Timor Lorosa´e) ne´e rekoñese katak dezenvolvimentu ne’e la´ós ohin halo hotu kedas maibé beibeik. “Ne’ebé la iha kestaun ida katak limitasaun ita la bele haree hanesan dezafiu maibé ita mós aprende tanba ne’e mak UNTL nia kooperasaun polítika ne’e atu habelar kooperasaun di´ak liután ba oin tanba apoiu barak husi nasaun seluk  hodi nune´e mak estudante sira aproveita didi´ak tempu hirak ne’e”.

Akadémiku ensinu superiór públiku ne´e relata, UNTL iha koperasaun barak iha nasaun oioin. “Asina kuaze 300 ona, iha instituisaun kuaze atus ida, iha kontinente hotu iha mundu. Iha medisina nian koperasaun ho Kuba, Austrália, Japaun, Portugal, Brazil, Indonézia. No mós, iha aspetu oioin sira la mai ho matéria maibé sira mai ho esperiénsia hodi partilla informasaun ba estudante liliu medisina sira”.

Nia mós haktuir, mundu fó atensaun, UNTL la hamriik mesak maibé  moris hamutuk ho nia parseiru sira, iha mundu ne’ebé mak apoiu bebeik iha Fakuldade Medisina, Siénsia no Saúde ho ekipamemtu ne’ebé iha. “Fiar katak sira bele sai médiku ne’ebé que di´ak,” garante Pró-reitór Eduardo Aniceto Serrão.

Pró-reitór dehan tan, ita mos iha asisténsia husi profesór sira ne’ebé mak iha esperiénsia tebes  husi médiku kubanu sira ne’ebe mak agora iha Timor-Leste. Ita-nia ekipamentu mós di´ak no aumenta beibeik husi nasaun barak no koperasaun barak mak hakarak apoiu UNTL, liliu Fakuldade Medisina no Siénsia Saúde para prepara joven sira, ne’ebé aprende iha área saúde nian.

“Nasaun barak mós iha hela proposta  ba UNTL atu estabelese laboratóriu, atu estabelese klínika ne’ebé avansadu no nia dezenvolvimentu mak neineik ba beibeik. Ita  iha esparansa katak loron ida UNTL sei harii mesak klínika,” nia haktuir.

Atu konklui, Pró-reitór UNTL reforsa: “Ospitál ne’ebé UNTL liuhusi Fakuldade Medisina planu ona, hodi tama ona ba  estratéjiku  prosesu nian. Hein de´it, tanba sei iha realizasaun nia laran, tanba UNTL hanoin katak estudante sira tenke iha prátika maka´as, tanba atende moras oioin”

Notísia relevante: http://www.tatoli.tl/2019/07/kodigu-etika-baze-importante-bainhira-halao-knaar/

Jornalista       : Felicidade Ximenes

Editór             : Rafy Belo

HAKEREK NO HATÁN

Please enter your comment!
Please enter your name here