DILI, 16 jullu 2019 (TATOLI)-Diretór Nasionál Serbisu Prizaun no Reinsersaun Sosiál, Ministériu Justisa, Hélder Cosme Marçal Belo, hatete, timoroan hotu iha responsabilidade ajuda estadu hodi prevene krime iha rai laran, tanba prizaun la’ós solusaun atu rezolve krime.
“Ha’u ko’alia beibeik ho jornalista sira di’ak liu halo prevensaun ba krime iha Timor tanba infraestrutura la’ós solusaun, maibé prevensaun maka solusaun,” hateten Hélder Cosme Marçal Belo, ohin, ba jornalista sira iha Timor Plaza, Dili.
Nia rekoñese katak, kazu krime aumenta ba bei-beik iha Timor Leste tanba ne’e númeru prizioneiru mós aumenta.
To’o tersa ohin (16/07/2019), prizioneiru sira ne’ebé kumpre pena iha komarka Becora, Gleno Munisípiu Ermera ho Komarka Suai, hamutuk na’in 760.
Hosi númeru ne’e, Prizioneiru iha Komarka Becora Munisípiu Dili hamutuk na’in 637, Gleno (115) no Komarka Suai (24).
Jornalista : Agapito dos Santos
Editór : Francisco Simões
