Jose Manuel Ramos Horta,Imajen Antonio Goncalves

DILI, 16 jullu 2019 (TATOLI)—Eis Prezidente Repúblika, José Manuel Ramos Horta, hateten timoroan hotu tenke lian ida de’it bainhira defende asuntu interese Estadu no nasionál hanesan Proposta Alterasaun Lei no Rezolusaun ba Ratifikasaun Tratadu Fronteira Marítima entre Timor-Leste ho Austrália.

“Timoroan hotu tenke lian ida de’it bainhira defende asuntu interese estadu nian,” tenik Horta iha resintu Parlamentu Nasionál (PN), bainhira akompaña audisaun konjunta entre komisaun tolu ho Governo no Negosiadór Prinsipál ba Delimitasaun Fronteira Marítima, Kay Rala Xanana Gusmão ho ninia ekipa, iha plenária, tersa (16/7).

La haluha mós, eis titulár ne’e fó parabéns ba Kay Rala Xanana Gusmão ho ninia ekipa ne’ebé halo serbisu hahú hosi prosesu negosiasaun to’o prosesu konsiliasaun obrigatória, ne’ebé konsege sosa asaun hosi kompañia petrolífera, ConocoPhilips ho Shell Energy iha konsórsiu Kampu Greter Sunrise no oras ne’e hein kompleta rekizitu en-termu lejizlasaun hodi Ratifika Tratadu Fronteira Marítima.

Nia dehan, maski Bankada FRETILIN fó sai ona pozisaun katak sei vota kontra ba proposta alterasaun lei haat ne’e, maibé Horta fiar katak maioria sei vota a-favór.

“Bainhira sira rona esplikasaun maun Xanana nian, espera Bankada FRETILIN bele muda sira-nia pozisaun, tanba asuntu ne’e Estadu nian. Ita hetan votasaun unaminidade di’ak liu para fó forsa bainhira ratifika iha loron 30 agustu no hatudu Timor-Leste nia maturidade,” katak Horta.

Jornalista: Evaristo Soares Martins

Editór: Xisto Freitas

Notísia Relevante: Labele Altera Lei Dala Rua iha Sesaun Lejizlativa Ida

HAKEREK NO HATÁN

Please enter your comment!
Please enter your name here