Enkontru entre Timor-Leste ho autoridade aviasaun Qatar. Foto: MNEK

DILI, 16 Jullu 2019 (TATOLI)-Governu Timor-Leste liuhusi Ministériu Negósiu Estranjeiru no Kooperasaun (MNEK), Dirasaun Europa, Áfrika, Medio Oriente organiza enkontru bilaterál konsulta entre Autoridade Aviasaun Sívil Timor-Leste no Qatar, iha MNEK, Praia dos Coqueiros, Dili, tersa (16/07/2019).

Diretór Jerál Asuntu Bilaterál, Isílio Coelho informa, enkontru bilaterál konsulta entre Autoridade Aviasaun Sívil Timor-Leste no Autoridade Aviasaun Sívil Qatar.

“Objetivu prinsipál husi enkontru konklui prosesu negosiasaun Air agreement (akordu áerea) entre Timor-Leste ho Qatar para iha futuru, bele fasilita mós ligasaun airlines (liña aera) entre rai rua ne’e”, hateten Diretór Asuntu Bilaterál, Isílio Coelho ba Ajénsia TATOLI.

Diretór Isílio Coelho informa tan katak esbosu padraun bazeia ba konvensaun internasionál aviasaun sívil. “Maioritariamente bazeia ba konvensaun ida ne’e, depois iha parte espesífika ruma, ita bele ajusta ba ita-nia lei no regulamentu nasionál”.

Tuir Diretor ne’e, relasaun kooperasaun entre rai rua ne’e di´ak tebes; ko’alia kona-ba kooperasaun konkretu iha nivel bilaterál. Nia hatutan, espera ho aproximasaun ida ne’e liuhosi akordu área ne’e bele loke dalan ba kooperasaun setór selseluk.

“Ita mós hatene katak Qatar mós nia país dezenvolve maka´as no buat barak ita mós bele aprende ho sira, servisu hamutuk atu ajuda dezenvolvimentu, ita-nia setor selseluk ne’ebé, ita presiza,” nia dehan.

Iha fatin hanesan, Diretór of Air Transport Departament ( Head of Delegation), Mohammed Faleh Al-Hajri katak ohin (tersa) diskute entre governu Timor-Leste ho statment Qatar relasaun kona-ba aviaun Qatar ne’ebé sei semo direita mai Timor-Leste.

“Iha futurumente espera, akordu ne’e bele hetan akordu entre parte rua, maibé ita hotu hatene katak ida ne’e akordu ida, ita hotu servisu para parte rua ne’e bele haree kle´an liu, para ba futuru akontese oinsa, mas fiar katak iha futuru relasaun la’o di´ak, aviaun hosi Qatar sei semo tama mai Timor-Leste,” dehan Mohammed.

Nia esplika, relasaun entre Timor-Leste ho Qatar di´ak tebtebes, ho akordu ida ne’e, bele fortifika liután: “Entre ita-nia kooperasaun, Timor-Leste ho Qatar, ha´u fiar katak ba futuru, relasaun Timor-Leste ho Qatar sei la’o ho di´ak no nia kontinuasaun kooperasaun di´ak, entre Qatar ho Timor-Leste, espera kona-ba akordu”.

“Périodu ba durasaun asina akordu ida ne’e, la iha nia limitasaun, ida atu halo kooperasaun liliu investimentu hanesan área ekonomia, bele koneksaun ema ba ema, ne’ebe di’ak liután ba ema ne’ebé utiliza Qatar Airlines, koñese di’ak liu país Qatar”.

Nia reforsa, bainhira simu tiha akordu, kestaun ba presu aviaun sei entrega fali ba kompañia Qatar.

“Iha ne’ebá sira iha presu rasik ho fiar katak kompañia mak determina presu, bainhira akordu rua ne’e la’o di’ak, espera katak Qatar mós sei fo presu ida tuir standard Qatar nian, no sei fó presu ne’ebé atu dada ema hotu, presu ida ita hotu bele atinji atu nune’e bele dada maluk timoroan sira atu ba vizita Doha,” nia haklean.

Iha fatin hanesan mós, Prezidente Autoridade Aviasaun Timor-Leste, Rosalia Ximenes hateten katak diskusaun  entre Timor-Leste ho Qatar espera katak loron rua nia laran bele asina.

Kona-ba kondisaun aeroportu nia dehan: “Aeroportu ne’e ita hare’e, maibé hare’e ba situasaun aviaun nia boot oinsa, aeroportu ho kondisaun hanesan ne’e, kuandu aviaun ki’ik nia bele tun”.

Entretantu, aviaun husi Qatar mai Timor-Leste ka lae, sei depende ba bainhira  asina ona akordu husi parte rua.

Jornalista       : Nelia Fernandes

Editór             : Rafy Belo

HAKEREK NO HATÁN

Please enter your comment!
Please enter your name here