Sekretáriu Estadu Juventude no Desportu, Nélio Issac Sarmento entrega tasa ba ekipa ne’ebé kampiaun iha Tasa Rantau. Imajen Agência Tatoli/Hortençio Sanchez

MANATUTO, 15 jullu (TATOLI)—Sekretáriu Estadu Juventude no Desportu, Nélio Issac Sarmento ofisialmente enserra Tasa Rentau ne’ebé realiza hosi komunidade Manatuto, segunda (15/7).

Abertura ba Tasa Rentau antes ne’e hala’o hosi eis Primeiru-Ministru, Kay Rala Xanana Gusmão iha 18 juñu liu-ba, ho objetivu selebra Loron Restaurasaun Independénsia 20 Maiu tinan ida ne’e no objetivu seluk mak kria amizade entre povu Manatuto.

Jogu refere partisipa hosi klube sanulu resin ualu (18) maibé klube rua de’it mak konsege hakat to’o finál. Klube rua ne’e mak FC Karlilo no FC Remis.

Iha jogu finál ne’e, FC Karlilo mak sai hanesan vensedór hafoin halakon armada Remis liuhosi xutu penalidade ho rezultadu 4-1.

Jogadór klube FC Karlilo no FC Remis. Imajen Agência Tatoli/Hortençio Sanchez

Prémiu ba ekipa kampiaun, Karlilo, Tasa rotativa ida ho tasa prémiu baibain ida no osan dolar atus rua ruanulu resin lima $225. Enkuantu, prémiu ba Ramis mak tasa baibain ida no osan atus rua sanulu resin lima $ 215 no terseiru lúgar FC Nunbei simu osan atus rua $200.

Orsamentu ba realiza jogu ne’e apoiu hosi Sekretaria Estadu Juventude  no Desportu (SEJD). Klube sanulu resin ualu ne’e fahe ba Grup A, B, C no D. Grupu A kompostu hosi klube Mabat FC, Jostri FC, FC Remis no Astro FC. Grup B mak hanesan Aimori FC, Butar FC, FC Loriku, União FC, no Balimas. Grup C mak Karlilo FC, Makokorei FC, FC Laleia no Numbei FC. Grup D mak hanesan Autehe FC, Kribas Sentrál, FC Siom, Kay Rala no Alonda FC.

Hafoin entrega prémiu, Sekretáriu Estadu Juventude no Desportu, Nélio Isaac Sarmento hateten, Manatuto, munisípiu ida ne’ebé prodúz ona jogadór barak. Tanba ne’e, nia dehan, joven Manatuto oan tenke la’o tuir dalan ne’ebé iha ona sai futebólista ne’ebé kualidade.

Administradór Postu Administrativu Manatuto Vila, Gaspar Henrique da Silva

“Eventu ida ne’ebé imi halo importante tebes. Tanbasá mak ha’u dehan importante. Tanba ida ne’e inísiu hosi atividade desportiva sira ne’ebé sei mai iha tinan-tinan. Se ita-boot sira susesu organiza Tasa Ramtau, ne’e signifika katak eventu sira tuir mai ne’e Manatuto preparadu ona atu realiza eventu desportiva,” tenik Nélio.

Tuir nia, maski Manatuto iha problema ba estádiu maibé nia promete katak tinan ida ne’e ramata, Manatuto bele utiliza ona estádiu ne’ebé oras ne’e iha faze konstrusaun.

“Iha problema barak mak ita hasoru ona kona-ba estádiu maibé ida ne’e la’ós de’it problema Governu nian. Problema komunidade tomak nian hotu. Tanbasá ha’u dehan hanesan ne’e tanba obra ba estádiu ne’e kaer hosi Manatuto nia oan rasik maibé la konsege finaliza tanba kestaun barak ne’ebé ha’u labele temi ida ba ida,” governante ne’e haktuir.

Iha fatin hanesan, Administradór Postu Administrativu Manatuto Vila, Gaspar Henrique da Silva haklaken Manatuto konsege realiza tasa ida ho susesu maibé sai haneaan tristeza ida ba sira tanba kondisaun kampu la sufisiente.

“Ohin realiza jogu ida ne’ebé kapa’as maibé ba ami sente tristeza ida tanba loloos eventu hanesan ne’e hala’o iha estádiu maibé ami-nia estádiu seidauk finalizadu,” tenik Gaspar.

Nia hatutan, Governu fó sai ona katak antes fulan ikus tinan ida ne’e sei finaliza estádiu, halo sira sente kontente tebes nune’e eventu ruma bele realiza iha estádiu. Jogu refere hetan partisipasaun másimu hosi komunidade Manatuto.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here