Eis Prezidente Repúblika, José Manuel Ramos Horta. Imajen dok. TATOLI

DILI, 16 jullu 2019 (TATOLI) – Laureadu  Nobel Dame nian, José Ramos Horta, husu ba estadu Timor Leste atu fó apoiu ba mídia nasionál, hanesan imprensa no rádiu sira ne’ebé nia ezisténsia durante tinan 10 ona.

José Ramos Horta konsidera, mídia sira ne’e, durante tinan 10 ba leten hatudu sira nia kbiit no korajen hodi kontribui ba pas no dezenvolvimentu maske sira sei hasoru difikuldade finanseiru.

“Estadu Timor Leste tenke haree orsamentu hodi fó apoiu ba ita nia mídia nasionál hanesan imprensa no rádiu sira,” afirma José Ramos Horta, ohin, bainhira remata enkontru ho Konsellu Imprensa (CI-sigla portugés), iha Faról, Dili.

Horta fó razaun katak ekonomia Timor Leste sei fraku hela, mídia sira hasoru difikuldade finanseiru, nune’e difikulta tebes jornalista sira nia serbisu hanesan falta ekipamentu, transporte, no la hetan saláriu ne’ebé dignu hanesan ema serbisu profisionál.

Eis Prezidente Repúblika fó ezemplu iha nasaun sira avansadu iha mundu hanesan Governu Austrália finansia ABC, iha Inglaterra estadu mak finansia BBC no Portugal nian hanesan RTP.

Ramos Horta mós halo esforsu atu ko’alia ho Parlamentu Nasionál hodi bele kria lei ida hodi fó biban ba Governu atu fó tulun ba mídia sira, intermus material no mós finanseiru, iha períodu tinan lima ka sanulu nian laran.

Jornalista : Domingos Piedade Freitas

Editór       : Francisco Simões

HAKEREK NO HATÁN

Please enter your comment!
Please enter your name here