Prezidente Konsellu Imprensa (CI-sigla portugés), Virgílio da Silva Guterres

DILI, 16 jullu 2019 (TATOLI)—Prezidente Konsellu Imprensa (CI-sigla portugés), Virgílio da Silva Guterres, sente “surpreza” (hakfodak) ho kazu diretora Ci nian na’in rua ne’ebé julga ona iha Tribunál Distritál Dili (TDD), segunda (15/07/2019).

Diretora CI na’in rua ho inisiál ATS no LVA sai arguida ba prosesu kazu abuzu podér no pekulatu uzu kamaan (simples) tanba Ministériu Públiku (MP) akuza utiliza patrimóniu CI nian (karreta Estadu) ba Kúpaun, Timor Osidentál (NTT-sigla Indonézia) hodi halo atividade interese privadu.

“Ha’u hanesan Prezidente CI, ha’u hatene no nota katak problema ne’e nunka mosu iha ha’u-nia meza, ka pelumenus iha meza plenária, maibé la akontese no sente hakfodak mosu fali iha Tribunál,” afirma Virgílio da Silva Guterres, hodi responde Agência TATOLI, ohin, hafoin enkontru ho Premiadu Nobel Dame nian, José Ramos Horta, iha Faról, Dili.

Virgílio Guterres klarifika katak CI lakohi halo intervensaun ruma ba prosesu ne’ebé la’o ona iha Tribunál, maski CI hanoin katak asuntu administrasaun ne’ebé bele rezolve iha CI, maibé ikus mai, hakfodak buat ne’e, to’o iha Ministériu Públiku no submete ba tiha ona Tribunál.

“Ha’u hanesan Prezidente CI konsidera kazu ne’e nu’udar problema interna CI nian no ha’u hanoin denúnsia ne’ebé hasoru diretora na’in rua ne’e mai hosi li’ur, maibé afinál hosi laran, liliu maluk fiskál úniku ho inisiál JP mak halo ida ne’e. Maluk ne’e mós CI mak kontratu nia,” hateten Virgílio Guterres.

Nia esklarese, tuir loloos, JP hanesan fiskál úniku ba CI ninia serbisu hodi haree regulamentu hirak ne’e, maibé ba kazu diretora rua ne’e, nia nunka hodi ba iha plenária ne’ebé mak nia tenke submete ba, tenke hato’o mai CI.

“Se CI la rezolve no la responde mak uza nia direitu sidadaun atu halo ba Ministériu Públiku tanba maluk JP ne’e CI mak kontratu nia,” tenik Virgílio da Silva Guterres.

Nia afirma tan, tanba prosesu ne’e la’o ona iha Tribunál, maka CI koopera nafatin ho Tribunál ba prosesu hotu ne’ebé la’o iha Tribunál.

Uza Karreta Estadu, Tribunál Julga Diretora CI Na’in Rua

Jornalista: Domingos Piedade Freitas

Editór: Xisto Freitas

HAKEREK NO HATÁN

Please enter your comment!
Please enter your name here