Premiadu Nobel Dame 1996, José Manuel Ramos Horta

DILI, 16 jullu 2019 (TATOLI)—Eis Prezidente Repúblika, José Manuel Ramos Horta, hateten Prezidente Rejiaun Administrativa Espesiál Oé-Cusse Ambeno (RAEOA) foun, tenke iha kapasidade mobiliza investidór atu investe iha rai laran.

“Agora sé mak ba fali Oé-Cusse ne’e tenke iha kapasidade mobiliza investidór sira, tantu internasionál no nasionál, tanba infraestrutura iha ne’ebá ita gasta ona millaun $500,” dehan Horta iha resintu Parlamentu Nasionál (PN), tersa (16/7), relasiona ho Parlamentu Nasionál (PN) halo ona alterasaun ba artigu rua hosi lei númeru 3/2014 18 jullu, kona-ba kriasaun Rejiaun Administrativa Espesiál Oé-Cusse Ambeno (RAEOA) no Zona Espesiál Ekonomia Sosiál Merkadu (ZEESM).

Artigu 19 hosi lei ne’e hateten, Prezidente RAEOA hetan pose hosi Prezidente Repúblika, bazeia ba proposta hosi Primeiru Ministru, maibé PN altera ona lei ne’e entaun Prezidente RAEOA presiza de’it deliberasaun hosi Konsellu Ministru no pose hosi Primeiru-Ministru—la presiza to’o iha Prezidente Repúblika.

Maski nune’e, Horta konsidera alterasaun lei ne’e  la fó importánsia ba lei autonómia rejiaun espesiál.

Nia esplika, bainhira lakohi ona Marí Alkatiri lidera RAEOA, entaun ema foun ne’ebé atu lidera tenke iha kapasidade hodi buka retornu ba Estadu.

“Ita halo aeruportu, halo estrada, maibé depois laiha kontinuidade, ne’e problema boot. Tanba ita gasta ona osan boot ba infraestrutura oioin iha Oé-Cusse maibé seidauk fó retornu,” Premiadu Nobel Dame ne’e haktuir.

Jornalista: Evaristo Soares Martins

Editór: Xisto Freitas

Notísia Relevante: Prezidente RAEOA Foun Liu De’it Hosi Deliberasaun KM

HAKEREK NO HATÁN

Please enter your comment!
Please enter your name here