Ministru Longuinhos dos Santos. Foto TATOLI: Egas Cristóvão

DILI, 16 jullu 2019 (TATOLI)- Ministru Ensinu Superiór Siénsia  no Kultura (MESSK), Longuinhos dos Santos preokupa tanba rezultadu avaliasaun ensinu superiór 11 husi Ajénsia Nasionál Avaliasaun no Akreditasaun Akadémika (ANAAA) nian hatudu sufisiente.

“Ida ne’e sai preokupasaun bo’ot ida tanba maioria avaliasaun ANAAA nian ne’e laiha instituisan ensinu superiór 11 ida mak hetan valór muito bom, maioria hetan sufisiente ho valór C,” hateten Ministru Longuinhos dos Santos iha Eis-ministériu Finansa, tersa (16/07/2019).

Governante ne´e relata, avaliasaun sira ne´e besik 9% mak la hetan akreditaaun inklui kursu ka Departementu Desportu ne’ebé tutela iha Universidade Nasionál Timor Lorosa´e (UNTL) mós la hetan akreditasaun.

Tanba ne’e mak ministériu ho ANAAA realiza atividade akadémika iha eis-salaun Ministériu Finansa ne’e ho objetivu atu lanxa fali programa kursu 53 ba instituisaun ensinu superiór 11 ne’ebé akredita ona. Sira ne’ebé partisipa mai husi magnífiku reitór no reprezentante universidade privada no mós avaliadora nasionál no internasionál.

“Tanba iha programa ba futuru nian mak hahú husi fulan jullu to’o dezembru ANAAA sei iha ninia funsaun atu halo avaliasaun ba programa foun tuir mai ho kursu 53 husi universidade 11 ne’e,” tenik Ministru Longuinhos dos Santos.

Ministru realsa tan katak kursu 53 ne’e mai husi área ekonomia, jestaun, edukasaun, enjiñária, agrikultura, direitu, siénsia sosiál no saúde. “Avaliasaun ANAAA nian ne’e hahú kedas iha tinan 2016-2018,” informa membru VIII Governu Konstitusionál ne’e.

Notísia relevante: http://www.tatoli.tl/2017/04/ensinu-superior-iha-tl-sei-hasoru-dezafiu/

Jornalista       : Tomé Amado

Editór             : Rafy Belo 

HAKEREK NO HATÁN

Please enter your comment!
Please enter your name here