Polisia kaptura ona suspeitu sira ne’'ebé deskunfia envolve iha kazu omesidiu iha Aldeia Baura, Suku Leorema, Postu Administrativu Bazartete, Munisípiu Liquiça. Imajen/Espesiál

DILI, 15 jullu 2019 (TATOLI)–Ekipa Komisaun B ne’ebé trata asuntu Defeza, Seguransa no Negósiu Estranjeiru, iha sesta semana kotuk, halo observasaun direta iha Aldeia Baura, Suku Leorema hodi hala’o diálogu ho komunidade hamutuk ho Polísia Eskuadra Bazartete, akompaña ho Batallaun Órden Públiku (BOP), nune’e mós aproveita vizita ba família matebian hosi kazu foin lalais ne’e.

Prezidente Komisaun B, Adérito Hugo da Costa hateten dezde akontesimentu kazu iha Leorema, Komisaun B sempre akompaña no halo koordenasaun ho komandu Polísia Nasionál Timor-Leste (PNTL) hodi halo atuasaun, nune’e durante observasaun iha terrenu haree katak líder komunitária sira ladún funsiona.

Konsellu suku, líder komunitária sira iha Leorema la-funsiona. Deskonfia Xefe Suku mós involve, entaun iha de’it Xefe Aldeia na’in-rua mak hala’o hela koordenasaun ho forsa polisiál,” tenik Adérito ba Agência Tatoli, iha resintu PN, segunda ne’e.

Nia haktuir, dezde akontesimentu ne’e to’o agora, komunidade Suku Leorema pániku tanba ne’e presiza koordenasaun entre komunidade suku no líder komunitáriu sira.

“Kuandu akontese iha nível suku halo povu pániku. Autoridade administrasaun sivíl sira tenke prezensa iha ne’ebá, ezemplu autoridade munisípiu, postu administrativu, atu bele konsolida fali funsionamentu konsellu suku, nune’e bele lidera koordenasaun ho seguransa katak konsellu suku funsiona hela, maibé sira laiha hotu. Ami preokupa ida ne’e,” nia haktuir.

Iha observasaun ne’e mós Komisaun B identifika laiha prezensa autoridade Munisípiu Liquiçá maibé iha de’it xefe aldeia na’in-rua.

“Forsa polisiál mak iha ne’ebá, maibé administrasaun munisípiu no postu la-marka prezensa iha ne’ebá”, haktuir Hugo.

“Ita agora lakohi rona buat ida sura mate hira, sunu uma hira, maibé nufin akontese nafatin iha territóriu Liquiçá nian,” akresenta Prezidente Komisaun B.

Nia dehan tan,  Munisípiu sira seluk hakmatek hela maibé Liquiçá mosu nafatin problema, tanba ne’e nia husu autoridade munisípiu tenke konsolida fali funsionamentu Suku Leorema nian, tanba to’o agora iha de’it xefe aldeia na’in-rua mak hala’o serbisu.

Entretantu, kazu Leorema akontese involve grupu juventude iha suku ne’e rasik hodi rezulta ema nain-rua mate iha fatin akontesimentu, uma 17 hetan sunu no mós motór 7 hetan sunu.

Munisípiu Liquiçá, Postu Administrativu Bazartete, iha suku 9 ne’ebé kompostu hosi Fahilebo, Fatumasi, Lauhata, Leorema, Maumeta, Metagou, Mota Ulun (Motaulun), Tibar no Ulmera

Jornalista: Evaristo Soares Martins

Editór: Xisto Freitas

Notísia Relevante:

Kazu Leorema, PNTL Kaptura Ona Suspeitu 12

Kazu Leorema, Tribunal Aplika Prizaun Preventiva Ba Arguido SPS

 

HAKEREK NO HATÁN

Please enter your comment!
Please enter your name here