DILI, 17 jullu 2019 (TATOLI)—Organizasaun Naun Governamentál (ONG), Lao Hamutuk halo submisaun ba Komisaun C Parlamentu Nasionál (PN) trata Asuntu Finansa kona-ba Proposta Alterasaun Lei Fundu Petrolíferu. Iha submisaun ne’e, sosiedade sivíl ne’e konsidera alterasaun ba lei presiza konsultasaun públika.

“Ami haree katak alterasaun ida ne’e la presiza halo ho ansi. Lei ida ne’e laiha tendénsia urjénsia atu altera ho lalais. Lao Hamutuk haree alterasaun Lei Fundu Petrolíferu ne’e halo ho ansi no lalais liu, la liu hosi konsultasaun ne’ebé inklui entidade importante hanesan Banco Central Timor-Leste (BCTL),” refere submisaun ne’ebé Agência Tatoli asesu hosi Lao Hamutuk iha kuarta (16/7).

Tuir ONG ne’e, alterasaun signifikante ba Lei Fundu Petrolíferu, tan ne’e presiza diskusaun nakloke no transparénsia hodi inklui entidade importante hanesan BCTL, Konsellu Konsultivu Fundu Petrolíferu (KKFP) no sosiedade sivíl sira.

Maski VIII Governu Konstitusionál konsidera proposta alterasaun Lei Fundu Petrolíferu ne’e nesesáriu atu fasilita ratifikasaun hosi Tratadu Fronteira Maritima, maibé tuir Lao Hamutuk Governu laiha razaun fundamentu atu tau hamutuk Lei rua ne’e iha pakote ida.

“Tuir ami nia hanoin, motivu Governu nian hodi tau hamutuk Lei Fundu Petrolíferu ho Ratifikasaun Tratadu Fronteira Marítima atu taka dalan ba públiku atu iha diskusaun krítiku no kestiona intensaun loloos hosi alterasaun Lei ne’e,” subliña nota ne’e.

Iha submisaun ne’e haktuir, iha tinan 2005, bainhira introdúz Lei Fundu Petrolíferu, Governu no PN uza tempu kuaze tinan ida bá konsultasaun públiku no debate iha PN atu Lei ida ne’e bele pasa no revizaun ikus liu ba ne’e akontese iha 2011, no Governu ho kuidadu halo audiénsia no aprezentasaun tinan ida resin ba prosesu ida ne’e.

“Governu iha tempu ne’ebá rekoñese katak mudansa saida de’it ba Lei Fundu Petrolíferu iha impaktu potensiál ba nasaun tomak nia estabilidade finansiamentu no povu nia moris di’ak (bem estar), maibé Governu nia proposta alterasaun foin lalais ne’e iha impaktu boot ba sustentabilidade Fundu Petrolíferu nian, maibé infelizmente, alterasaun ne’e la halo konsultasaun ho públiku, halo ho ansi no lalais liu no la inklui entidade importante sira seluk, sita submisaun ne’e.

Análiza Artigu Espesífiku

Submisaun Lao Hamutuk haktuir, bainhira Timor-Leste estabelese Fundu Petrolíferu iha tinan 2004-2005, lori kuaze tinan ida hala’o diskusaun no konsulta públiku.

“Ita nia sistema jestaun ba reseita mina no gás sai nu’udar sistema avansadu ne’ebé tane aas transparénsia no akontabilidade. Lei ida ne’e dezenvolve hanesan parte ida atu asegura ekidade interjerasaun no sustentabilidade finanseira ba futuru Timor-Leste,” afirma nota ne’e.

Tuir análize ONG ne’e, artigu 15 hosi Lei Fundu Petrolíferu iha konteúdu importante kona-ba limitasaun oinsá atu investe Fundu Petrolíferu, tanba ne’e limitasaun hirak ne’e proteje Fundu Petrolíferu kontra risku aas no ezije transparénsia.

Maski nune’e, proposta alterasaun iha artigu 15A ba investimentu iha Operasaun Petrolíferu signifika katak definisaun ba “investimentu elijiveis” ne’ebé elabora iha artigu 15 sei la aplika ona ba investimentu iha “operasaun petrolíferu” (15A.2 1).

Nune’e, limitasaun ne’ebé la aplika ona iha proposta alterasaun Lei Fundu Petrolíferu mak hanesan investimentu sei aloka iha rai li’ur iha jurizdisaun ne’ebé hetan rekoñesimentu internasionál (15.1), másimu %5 hosi Fundu ne’e sei investe iha ativu elijível se kumpri ona kritéria balun (15.4), no labele investe liuhosi %3 hosi total Fundu ba kompañia ka entidade ida (15.5.a).

Artigu 15A kansela limitasaun ba kompañia ida de’it atu simu investimentu hosi Fundu no fó dalan ba aumenta liu %3 hosi Fundu atu investe diretamente ba kompañia petrolíferu de’it, tanba ne’e ONG ne’e konsidera sei fó ameasa boot ba Fundu, tanba Timor-Leste depende de’it ba kompañia ida nia susesu ka fallansu no bele hamosu risku ba Timor-Leste nia seguransa finansiál.

Nune’e mós, ONG ne’e preokupa kona-ba impaktu hosi mudansa hirak ne’e ba estabilidade no seguransa hosi Fundu Petrolíferu no fó dalan ba investimentu ne’ebé lahó regra ne’ebé forte diretamente mai hosi Fundu Petrolíferu iha “operasaun petrolíferu”, no mós loke dalan ba ameasa no risku boot ne’ebé bele hafraku regulasaun ne’ebé eziste ona iha investimentu Fundu Petrolíferu.

“Ami mós toma nota katak halo artigu 15 la aplika ba investimentu ba operasaun petrolíferu, signifika katak alterasaun ne’e hafásil dalan ba operasaun petrolíferu atu la submete informasaun espesífiku ba Parlamentu Nasional (15.4.a). Aleinde ne’e, alterasaun ne’e mós hafraku sistema jestaun no aprovizionamentu ministeriál ba desizaun ba investimentu, refere submisaun.

Tan ne’e, Lao Hamutuk fó rekomendasan ba PN, liu-liu Komisaun C, atu hasai artigu foun 15.A iha ezbosu alterasaun no hala’o konsulta públiku ne’ebé involve entidade relevante no PN tenke uza kapasidade tomak atu determina tempu natoon no hetan suporta legál hodi lee no intende lei Fundu Petrolíferu molok halo diskusaun iha PN.

Nune’e mós PN no Governu labele sees hosi objetivu atuál hosi formasaun Lei Fundu Petrolíferu katak fundu ne’e la’ós ba jerasaun ohin de’it maibé ba jerasaun oin mai no ikus liu PN tenke kuidadu ho alterasaun ne’e, tanba bele halakon PN nia podér nu’udar reprezentante povu ne’ebé tuir kbiit tomak hodi desidi alokasaun rekursu ba dezenvolvimentu.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here