Xefe Bankada FRETILIN, Aniceto Guterres akompañadu hosi Vise Xefe Bankada FRETILIN, Francisco Miranda Branco, halo Konferénsia ba imprensa hodi hato’o pozisaun bankada ba pakote lejizlativa ne’ebé Governu submete. Imajen Mídia Bankada FRETILIN

DILI, 16 jullu 2019 (TATOLI)–Xefe Bankada opozisaun FRETILIN, Aniceto Guterres liuhosi konferénsia imprensa, deklara pozisaun bankada ne’ebé sei vota kontra pakote lejizlasaun tomak hosi Governu, tanba konsidera hamihis ka halakon respeita ba Konstituisaun no Lei sira.

“Iha de’it sesaun lejizlativa ida ne’e, lei kona-ba Atividade Petrolífera sei hetan alterasaun dala rua. Loloos, lei ida labele hetan alterasaun liu dala ida iha sesaun lejizlativa ida,”  tenik Aniceto iha salaun Bankada FRETILIN, Parlamentu Nasionál (PN), tersa ne’e.

Tuir Xefe Bankada ne’e, razaun Bankada FRETILIN atu vota kontra tanba alterasaun daruak ne’e hatudu katak Governu no Bankada sira ne’ebé aprova alterasaun dahuluk iha sesaun lejizlativa ida ne’e rekoñese katak sira halo ona sala iha alterasaun ida uluk, no alterasaun sira ne’e la halo ho estudu no anáize ne’ebé kle’an no planeadu didi’ak no la halo tuir interese estadu nian.

Aniceto hatutan, razaun seluk mak Lei Fundu Petrolíferu nu’udár lei estruturante ida ne’ebé labele sofre alterasaun no presiza iha konsultasaun públiku.

“Atu altera lei importante hanesan Lei Fundu Petrolíferu, loloos tenki tuir prosesu diálogu no konsulta ho parte relevante sira hotu, inklui Konsellu Konsultivu ba Fundu Petrolíferu (KKFP) no organizasaun sosiedadi sivíl sira. Maibé, ida ne’e la akontese,” nia esplika.

Nune’e mós, Aniceto argumenta, Lei Fundu Petrolíferu la hola parte ba pakote lejizlasaun sira ne’ebé presiza altera agora ba ratifikasaun Tratadu Fronteira Marítima.

“Lei Fundu Petrolíferu laiha ligasaun ruma ho Tratadu Fronteira Marítima tanba lei ida ne’e regula de’it jestaun ba Fundu Petróleu, asuntu interna Timor-Leste nian. Bankada FRETILIN la konkorda atu halo alterasaun ba Lei Fundu Petrolíferu, satán altera ho lufu-lafu de’it no atu benefísia de’it grupu balun,” nia dehan tan.

Eis Diretór CAVR ne’e hateten VIII Governu rasik la hato’o inisiativa lei ruma mai PN,  Maibé lei hirak ne’ebé atu altera agora ne’e governu lori mai PN atu debate no aprova lalais maski Prezidente Parlamentu rasik la konsidera lei hirak ne’e iha karáter urjénsia.

Aniceto realsa, Bankada FRETILIN mós kestiona kontiúdu balun tratadu nian. “Se Tratadu Fronteira Marítima ne’e defini katak kampu Greater Sunrise tomak iha Timor-Leste nia fronteira laran, tanbasá mak tratadu ida ne’e inklui ona kona-ba partilla rekursu. Nune’e mós, se inklui ona partilla rekursu, tanbasá mak la inklui kedas pipeline tenki mai Timor-Leste no agora ita sosa fali pipeline?,” nia kestiona.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here