Sekretáriu Konsellu Superiór PNTL, Superintendente Xefe Carlos Jerónimo, Imajen/Eugénio Pereira

DILI, 16 jullu 2019 (TATOLI)- Liu husi enkontru estraordináriu Konsellu Superiór Komandu Polisia Nasionál Timor-Leste (KS-PNTL), ohin, kontinua halibur opiniaun husi komandante unidade hotu atu revee lejizlasaun sira iha polisia.

Sekretáriu Konsellu Superiór PNTL, Superintendente Xefe Carlos Jerónimo dehan, Komandu PNTL presiza tempu hodi diskute didi’ak revizaun ba lejizlasaun sira iha PNTL hanesan lei orgánika, estatutu no mós regulamentu dixiplinár, hodi aprezenta ba Ministru Interiór  interinu, Filomeno  da Paixão de Jesus para lori ba halo diskusaun iha Konsellu Ministru.

“Ami hala’o enkontru Konsellu Superiór estraordináriu ida ne’e hakarak foka liu hadi’a didi’ak lai ita nia proposta alterasaun lei tolu hanesan, lei orgánika, regulamentu dixiplinár no estatutu foun,”  informa  Superintendente Xefe, Carlos Jerónimo, ba jornalista iha Kuartél Jerál PNTL, Caicoli, Dili.

Iha enkontru ne’e Konsellu Superiór PNTL ne’ebé lidera husi Komandante Jerál PNTL, Komisáriu Faustino da Costa,  diskute mós Norma Operasionál Prosedura (NOP) rua hanesan, norma oinsá uza kilat no ko’alia mós kona-ba orsamentu alimentár ba PNTL.

Carlos Jerónimo hatutan, liuhusi enkontru ne’e komandante unidade PNTL sira hato’o opiniaun matenek sira hodi Konsellu Superiór Komandu PNTL bele diskute no aprova proposta ne’e ho di’ak.

Iha diskusaun ne’e PNTL halo mós mudansa makas ba regulamentu dixiplinár PNTL  ne’ebé fó podér ba Departamentu Justisa sei hala’o knaar no ezekuta misaun sira ne’ebé iha relasaun ho justisa no kestaun dixiplinár sira.

Departamentu Justisa nia organizasaun, kompeténsia no funsionamentu tenke tuir norma sira Konstituisaun nian, lei no diretiva sira ne’ebé vigora iha Repúblika Demokrátika Timor-Leste nia territóriu laran, hanesan Artigu 2, 16 to’o 28, no Artigu 31 no Artigu 147 husi Konstituisaun Repúblika Demokrátika Timor-Leste, Dekretu-Lei 9/2009 (Lei Orgánika PNTL nian) no Dekretu-Lei No. 13/2004 (PNTL nia Regulamentu Dixiplinár).

Departamentu Justisa ninia Funsaun  fó apoiu no asisténsia legál hodi prepara prosesu legál sira ne’ebé envolve PNTL nia unidade, serbisu ka Komandu sira, laho prejuizu ba podér dixiplinár ne’ebé komandante sira husi eskalaun hotu-hotu iha. Dezenvolve, propoin no koordena medida sira ne’ebé nesesáriu hodi impoin kumprimentu ba justisa no dixiplina no garante padraun ba prosedimentu, metodolojia no téknika ne’ebé aplikavel ba investigasaun dixiplinár sira.

Hala’o investigasaun  ba kazu sira ne’ebé iha natureza dixiplinár hasoru membru PNTL sira ne’ebé servisu iha Kuartél Jenerál PNTL nian ka iha unidade ka servisu sira ne’ebé laiha Seksaun Justisa. Hala’o investigasaun ba kazu sira ne’ebé mak iha natureza dixiplinár ne’ebé, tanba sira-nia gravidade, sensibilidade ka urjénsia, iha potensialidade atu halo fo’er PNTL nia imajen institusionál ka satan instituisaun ne’e atu hala’o nia misaun.

Kontrola membru PNTL hotu-hotu nia partisipasaun no pontualidade durante marxa sira ne’ebé obrigatóriu, asegura katak membru hotu-hotu ne’ebé prezente tenke asina loloos diáriu kona-ba partisipasaun iha marxa sira-ne’e. Fó apoiu ba Gabinete Inspetór Jerál nian iha knaar ne’ebé nia hala’o kona-ba administrasaun justisa no dixiplina nian. Fó apoiu ba Komandante Jerál iha área hotu-hotu ne’ebé iha relasaun ho administrasaun justisa nian no dixiplina.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here