Prezidente Repúblika, Francisco Guterres Lú Olo, simu karta kredensiál hosi Embaixadora Polônia, Beata Stoczynski. Imajen Mídia PR

DILI, 16 jullu 2019 (TATOLI)–Ohin, iha oras ne’ebé la hanesan, Embaixadór hosi nasaun tolu entrega karta kredensiál ba Prezidente Repúblika (PR), Francisco Guterres Lu Olo, iha Palásiu Prezidente Nicolau Lobato, Bairru Pité, Dili.

Karta kredensiál hosi nasaun tolu ne’e entrega direta hosi embaixadór extraordináriu no plenipotensiáriu Finlândia, Jari Sinkarino, Embaixadór estraordináriu no pleniapotensiáriu Reinu Unidu (RU), Owen Jenkinsno, no mós embaixadór estraordináriu no plenipotensiáriu Polônia, Beata Stoczynski.

Ministra Negósiu Estranjeira no Kooperasaun Interina atuál vise Ministra Solidariedade Sosiál no Inkluzaun, Signi Verdiál, hafoin akompaña embaixadór sira hateten, embaixadór na’in tolu ne’e rezidente iha Jakarta, no ohin sira mai aprezenta sira-nia karta kredensiál tanba sira mós serbisu hamutuk ho Timor Leste.

Signi esplika, Konteúdu karta kredensiál hosi nasaun tolu ne’e hanesan de’it, liliu atu kontinua kooperasaun ho Timor-Leste iha área Edukasaun, meiu ambiente no mós área kapasitasaun rekursu umanu.

Ministra interina ne’e hatutan, kooperasaun entre nasaun tolu hala’o ona durante tinan barak nia laran, hanesan Reinu Unidu fó ona  bolsu estudu ba timoroan barak ne’ebé realiza kada tinan. Polônia mós sei oferese tan bolsu estudu ba timoroan sira iha área doutoramentu, inklui Finlândia sei fó mós apoiu ba área edukasaun liliu iha kursu temporáriu ba diplomata timoroan sira ho durasaun fulan neen to’o tinan ida.

Aleinde ne’e, iha kompromisu katak, sei halo kooperasaun iha  área sira ne’ebé konsidera iha poténsia. Kona-ba situasaun Brexit iha Reinu Unidu, Signi hateten, durante enkontru, embaixadór Reinu Unidu la ko’alia kona-bá ida ne’e, maibé laiha impaktu ba timoroan sira iha nasaun refere.

Jornalista: Cipriano Colo

Editór : Xisto Freitas

HAKEREK NO HATÁN

Please enter your comment!
Please enter your name here