Sekretáriu Estadu ba Asuntus Kombatentes Libertasaun Nasionál Gil da Costa Monteiro 'Oan Soru'".Imajen/Antonio Goncalves

DILI, 15 jullu 2019 (TATOLI)—Sekretáriu Estadu ba asuntu Antigu Kombatente Libertasaun Nasionál no Veteranu, Gil da Costa Monteiro ‘Oan Soru’ informa Komisaun Instaladora realiza ona konferénsia munisipál iha munisípiu tolu hodi prepara ba kogresu nasionál harii Konsellu Nasionál Veteranu.

“Konferénsia munisipál iha Munisípiu Lautém no Baucau la’o hotu ona no aban (ohin-16 jullu) iha Manatuto. Purtantu, foin mak munisípiu tolu,” nia tenik iha Palásiu Governu hafoin relata atividade ministériu relevante ba Primeiru-Ministru (PM), Taur Matan Ruak, segunda (15/7).

Nia fiar katak konferénsia munisipál bele konklui iha tinan ida ne’e nia laran. Liuhosi konferénsia munisipál, kada munisípiu sei hili ema na’in lima no entre ema na’in lima aban bainrua sei hili sira-nia reprezentante rasik atu mai túr iha estrutura nasionál, ne’ebé sei liuhosi Kongresu Nasionál.

Konferénsia Minisipál ne’e sei finaliza iha outubru tinan ne’e hafoin Kongresu Nasionál sei realiza iha Loron Nasionál Veteranu, 1-3 marsu 2020.

Iha biban hanesan, veteranu ne’e mós relata atividade ministériu ninian ba Xefe Governu. “Atividade veteranu ninian kona-ba restu mortál sira, polítika ba komisaun instaladora ne’ebé agora dadauk la’o ona, polítika verifikasaun dadus 2019 bainhira mak atu la’o, modelu polítika ne’ebé mak atu halo hodi fó valór ba veteranu sira, liliu ba sira tinan 24, 15 no 19,” nia akresenta.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here