Adjuntu Sekretáriu Jerál Federasaun Futeból Timor-Leste (FFTL), Frederico Martins

DILI, 16 jullu 2019 (TATOLI)—Adjuntu Sekretáriu Jerál Federasaun Futeból Timor-Leste (FFTL), Frederico Martins informa klube tolu de’it mak submete ona dokumentu ba lisensa Asean Football Confederation (AFC).

Klube tolu ne’e mak hanesan AD SLB Laulara, Lalenok United FC no Boavista FC Timor. Enkuantu, klube lima seluk hanesan Karketu Dili FC, Académica FC, Atletico Ultramar no AS Ponta Leste la submete dokumentu hodi hasai lisensa AFC maski FFTL durante ne’e loke ona inskrisaun.

Objetivu hosi rejistrasaun refere atu klube sira iha Timor-Leste bele hetan lisensa hodi bele partisipa iha jogu AFC Cup. Kritéria lima ne’ebé klube sira tenke submete dokumentu mak hanesan Desportivu, Legál, Pesoál & Administrasaun, Insfraestrutura no Finansa.

Frederico dehan, prosesu rejistrasaun dadaun ne’e tama ona ba faze datoluk hanesan kritéria desportiva. Entretantu, kritéria rua ne’ebé liu ona mak hanesan kritéria legal, personal no kritéria administrativa.

Dokumentu ne’ebé klube sira seidauk submete hela rua maibé ladún todan. “Klube sira sei falta tan de’it kritéria rua hanesan infraestrutura no finansa maibé ne’e kamaan uituan,” dehan Frederico ba jornalista iha edifísiu FFTL, Bairru Formosa, Dili, ohin.

“Federasaun Futeból nia papél mak oinsá atu enkoraja nafatin klube sira atu hasai lisensa klube nian ba AFC. Hakarak lakoi klube sira tenke tuir kritéria lima ne’ebé fó sai ona. Agora dadauk, federasaun iha ona ekipa kompostu ema na’in rua, sira nia serbisu mak oinsá atu hakbesik án ba klube hodi bele trata sira nia dokumentu,” tenik Frederico.

Nia hatutan, kritériu ikus liu mak kada klube tenke iha ekipa Juvenil rua. Tanba haree ba kondisaun klube Timor-Leste seidauk sufisiente, FFTL sei haruka karta ba AFC nune’e bele fó esepsaun nune’e klube sira bele iha de’it ekipa Juvenil ida mak U-16.

Bazeia ba kritéria loloos hosi AFC, klube Primeira Divizaun hotu tenke iha ekipa Juvenil rua mak hanesan U-15 no U-16. Fó hanoin fali, rejistrasaun ba jogu Juvenil dadaun ne’e la’o hela no sei hala’o jogu iha setembru mai ne’e.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here