Prezidente Tatoli, José da Costa. Foto/Jogerjo Guterres.

DILI, 16 jullu 2019 (TATOLI)– Prezidente Ajénsia Notisioza Timor-Leste-Tatoli, José da Costa, informa iha jullu nia rohan sei selebra ezisténsia Tatoli ba tinan tolu no transforma embriaun Tatoli ba Tatoli hanesan Institutu Públiku (IP).

 “Ami prepara hela, iha jullu nia rohan selebra ezisténsia Tatoli ba tinan tolu no marka transformasaun embriaun Tatoli ba Tatoli Institutu Públiku” José da Costa ba jornalista sira iha nia servisu fatin, Palásiu Governu, ohin.

José akresenta katak Tatoli iha hela embriaun nia laran to’o agora, “naran ida embriaun seidauk sees hosi ami, maibé to’o tempu ona atu haree hodi kumpre dekretu lei hanesan Institutu Públiku”.

Tanba ne’e, kuandu temi ona IP, signifika tenke iha fasilidade sira, rekursu umanu, regra no seluk tan.

José da Costa salienta katak tuir planu, selebrasaun ezisténsia Tatoli durante tinan tolu nia laran sei akontese iha 31 jullu no sei realiza iha Dili, nune’e mós bele adia konforme preparasaun.

Maibé, preparasaun durante ne’e la’o di’ak hela tanba komisaun sira hala’o hela sira-nia servisu hodi prepara proposta atu enkamiña ba Sekretáriu Estadu Komunikasaun Sosiál (SEKOMS) hodi bele hetan apoiu.

Iha selebrasaun ne’e, sei marka prezensa hosi órgaun soberania no mídia na’in sira.

Ajénsia Tatoli,IP nu’udar ajénsia ofisiál estadu Timor-Leste nian. Nia ezisténsia mai husi inisiativa Sekretáriu Estadu Komunikasaun Sosiál (SEKOMS), iha 2012-2017.

Tatoli,IP nu’udar transformasaun husi ETNA (East Timor News Agency), ne’ebé depois nakfila ba ANTIL (Ajénsia Notisioza Timor-Leste). Ajénsia estadu ne’e hetan aprovasaun iha Konsellu-ministru no públika iha Jornál Repúblika iha loron 14 marsu 2016, nu’udar embriaun ho naran ANTIL.

ANTIL ne’e lansa husi Primeiru-Ministru, Rui Maria de Araújo, iha loron 27 jullu 2016. Iha marsu 2017, Konsellu-Ministru aprova ANTIL sai Tatoli, nu’udar ajénsia ofisiál Estadu Timor-Leste nian no publika iha Jornál Repúblika. Tatoli ho nia estatutu rasik nu’udar Institutu Públiku (IP).

Objetivu primeiru estabelese ajénsia estadu Timor-Leste mak sai fontes informasaun ofisiál estadu Timor-Leste ne’ebé iha kapasidade no kbiit elabora produtu informasaun no notísia ne’ebé nesesita husi públiku utilizadór informasaun iha eskala nasionál, rejionál no internasionál.

Segundu, mak nu’udar implementadór konstituisaun ne’ebé sai devér governu nian atu fó servisu oferesimentu informasaun ne’ebé kredivel no loos nomós sai direitu informasaun sosiedade Timor-Leste ne’ebé garantidu husi artigu 40 no 41 konstituisaun Timor-Leste nian.

Terseiru, mak nu’udar instituisaun komunikasaun informasaun, Ajénsia Tatoli.IP la’ós de’it sai produtór informasaun maibé mós bele iha papél nu’udar “National information clearing house” ne’ebé iha tarefa fó klarifikasaun no informasaun serteza, halakon misinformasaun no disinformasaun. Bele sai nu’udar “área istória” no “eskritór istória” pátria, nasaun, sosiedade nomós nu’udar “maklibur no fornesedór informasaun públiku”.

Kuartu, mak halo ajénsia notisioza Tatoli,IP nu’udar padraun minimál kompeténsia jornalístika ba jornalista Timor-Leste ne’ebé sempre bele prodús produtu informasaun-karreira jornalístika ne’ebé iha kualidade tuir dinámika sosiál no nesesidade informasaun sosiedade nian.

“Fenómena no dinámika sosiál” ne’ebé “dinámika komunikasaun” ne’ebé estimula ho dezenvolvimentu teknolojia komunikasaun-informasaun lori konsekuénsia iha Timor-Leste ho paradigma  nesesidade informasaun públiku iha ne’ebé Tatoli nu’udar ajénsia notísia nasionál Timor-Leste ne’ebé la’ós de’it ezije atubele fornese pakote informasaun iha kontextu “mainstream”, maibé iha futuru bele mós obrigadu prodús informasaun alternativa ho karater “taylor made” ne’ebé propoen husi utilizadór informasaun determinada.

Tatoli nu’udar ajénsia notísia Timor-Leste ho karater multikanál, multimédia, multiplataforma no multitarefa ne’ebé bele mós dezevolvidu no iha funsaun nu’udar sentru produsaun filme no dokumentasaun nasaun, sentru opiniaun públiku nomós fórum informasaun públiku, sentru jestaun arkivu no dokumentu nasaun nomós sentru edukasaun-formasaun peskiza no dezenvolvimentu komunikasaun aplikada.

Funsaun oioin, papél, abilidade no ferramenta komunikasaun institusionál ajénsia notisioza ne’e iha nia tempu bele fonte konsumu ba ajénsia notisioza ne’ebé posibilita ajénsia notísia Timor-Leste ne’e moris no dezenvolve nu’udar instituisaun komunikasaun ho karater “income generate” (bele rezulta konsumidór) no la bebeik nu’udar “cost center” (sai pezu finanseiru).

Tatoli,IP nu’udar ajénsia notísia nasionál Timor-Leste ne’ebé moris, dezenvolve ho jestaun ne’ebé profisionál, apoiadu husi rekursu umanu ne’ebé kompetente ho apoiu saláriu minimál ne’ebé sufisiente no ho apresia kompeténsia no kapasidade nia jornalista sira halo bele sai “modelu” no “padraun indústria komunikasaun-informasaun no prátika jornalístika” futuru ne’ebé ho kualidade-dignidade nu’udar inventáriu nasionál Timor-Leste.

Jornalista : Zezito Silva

Editora : Maria Auxiliadora

HAKEREK NO HATÁN

Please enter your comment!
Please enter your name here