Komandante Jerál PNTL Komisáriu Faustino da Costa, fó pose ba Superintendente, Jorge Nelson Amado Monteiro ho Inspetór Xefe Mouzinho Tavares Correia. Imajen/PNTL

DILI, 16 jullu 2019 (TATOLI)- Komandu Polísia Nasionál Timor Leste (PNTL) ne’ebé lidera husi Komisáriu   Faustino da Costa, kontinua halo mudansa ba estrutura serbisu komandu nian.

Komandante Jerál PNTL Komisáriu Faustino da Costa kaer liman ho Superintendente, Jorge Nelson Amado Monteiro. Imajen/PNTL

Iha Sesta (12/07/2019), Komandu PNTL  nomea atuál Komandante Serbisu Investigasaun Kriminál Nasionál (SIKN) Superintendente, Jorge Nelson Amado Monteiro ba lidera fali Komandu Munisípiu Aileu, no nomea Inspetór Xefe Mouzinho Tavares Correia, nu’udar Komandante interinu ba Polísia Sientífika Investigasaun Kriminál (PNSIK).

Nomeasaun ba Superintendente Jorge Nelson Amado Monteiro, bazeia ba despaxu númeru 198/CG-PNTL/VII/2019 no Inspetór Xefe Mouzinho Tavares Correia tuir despaxu númeru 199/CG-PNTL/VII/2019.

Komandante Jerál PNTL, Komisáriu Faustino da Costa, husu ba komandante enposadu na’in rua atu bele kria atividade ruma iha sosiedade, veteranu no komunidade sira leet hodi bele manan fila fali konfiansa sira ba Instituisaun PNTL hodi garante dame.

Komisáriu Faustino husu atu PNSIK kontinua hala’o ninia serbisu too  tempu Governu taka Polísia Sientífika Investigasaun Kriminál maka PSIK bele podér serbisu di’ak liután ba PNSIK atu hala’o knaar ho di’ak liután.

“Mantein ita nia serbisu hodi bele hetan nafatin konfiansa husi komunidade ne’ebé ita serve ba no dezafiu boot mak ha’u atu fó ba Inspetór Xefe Mouzinho, se tinan oin maka governu deside taka PSIK (Polisia Sientífika Investigasaun Kriminál) hodi mantein PNSIK (Polísia Nasionál Sientífika Investigasaun Kriminál) ha’u agradese tebes,” dehan Komandante PNTL Komisáriu Faustino hodi fó korajen ba enposadu na’in rua ne’e iha Komandu PNTL, Caicoli, Dili.

Komisáriu Polísia agradese ba Superintendente Jorge ne’ebé durante ne’e dedika aan hodi hala’o serbisu di’ak iha PNSIK ho relatóriu sira ne’ebé aprezenta mai Komandu klaru no kompletu tebes, husu atu mantein nafatin serbisu di’ak ba iha Komandu Munisípiu Aileu.

Partisipa iha serimónia nomeasaun  ne’e; Superintendente Xefe Carlos Jerónimo, Superintendente Xefe Pedro Belo, Superintendente Xefe José Soares no Superintendente Xefe Armando Monteiro.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here