Ministru Justisa ,Manuel Cárceres da Costa, foto hamutuk ho Guarda Prijaun Na'in 30 ne’ebe tuir formasaun kona-ba levantamentu dadus ho lideransa ne’ebé oferese husi UNODC no UNAFEI, iha Salaun Suai Room Timor Plaza, Dili, Tersa (16/07/2019). Imajen/Egas Cristovão

DILI, 16 jullu 2019 (TATOLI)Organizasaun Nasoins Unidus ba Asuntu Krime no Droga (UNODC-sigla Inglés) ho Instituisaun  Nasoins Unidus nian ba Prevensaun Krime iha Estrimu Oriente (UNAFEI-sigla Inglés), ohin, fó formasaun ba Guarda Prizionál hamutuk na’in 30  kona-ba levantamentu dadus (assessment) no lideransa.

Formasaun ne’e sei hala’o durante loron haat (4), hahú husi loron 16 to’o loron 19 jullu 2019, ne’ebé hala’o iha Salaun Suai Room, Timor Plaza, Dili.

Ministru Justisa, Manuel Cárceres da Costa,  konsidera,  formasaun ne’e importante hodi aumenta liután koñesimentu  no kapasidade guarda prizaun sira  nian, liu-liu kona-ba levantamentu dadus ho jestaun atu fó atendimentu ba dadur sira.

formasaun ne’e partisipa husi formandu na’in 30, kompostu husi diretór, xefe departamentu no guarda prizaun Becora, Gleno, ho prizaun Suai.

Ministru Manuel Cárceres,  hateten, guarda sira iha responsabilidade boot atu jere no transforma  mentalidade   dadur sira nian hodi sai fali sidadaun sivilizadu.

Atu atinje tarjetu ne’e, tuir Manuel Cárceres, guarda prizaun sira presiza atende ho domin no haraik-an hodi mantein espíritu unidade iha prizaun.

Oportunidade ne’e, formadóra husi UNAFEI,  Mana Yamamoto, garante katak, formasaun ne’e sei tulun guarda prizaun sira atu hala’o sira nia serbisu ho étika no profisionál.

Atividade ne’e hetan apoiu fundu husi governu Japaun, ne’ebé azekuta husi UNODC ho UNAFEI.

Jornalista : Nelson de Sousa

 Editór      : Francisco Simões

HAKEREK NO HATÁN

Please enter your comment!
Please enter your name here