Sekretáriu Estadu ba Komunikasaun Sosiál, Merício Juvinal dos Reis 'Akara', akompaña husi Prezidente TATOLI.IP José da Costa (Loos) no ekipa husi SECOMS entrega karreta Estadu ba Tatoli hodi fasilita servisu Tatoli nian, iha Palásiu Governu, Dili, Tersa (16/07/2019). Imajen/Egas Cristovão

DILI, 16 jullu 2019 (TATOLI)–Governu liuhosi Sekretáriu Estadu Komunikasaun Sosiál (SECOMS, sigla portugés), Merício Juvinal dos Reis “Akara” ne’ebé akompaña hosi Diretór Jerál Administrasaun hosi Ministériu Reforma Lejizlativa Asuntu Parlamentár (MRLAP), Ponciano da Costa Leite, entrega karreta rua ho motor tolu ba Ajénsia Tatoli atu fasilita servisu jornalista sira nian.

“16 jullu 2019, iha termu entrega karreta Estadu ba Ajénsia Tatoli, iha karreta rua ho motorizada tolu, enkuantu iha karreta ida tan ne’ebé apoiu ba Diresaun Nasionál Diseminasaun Informasaun” Diretór Jerál Administrasaun hosi Ministériu Reforma Lejizlativa Asuntu Parlamentár (MRLAP), Ponciano da Costa Leite, ba jornalista sira iha Palásiu Governu, ohin.

Ponciano husu ba Ajénsia Tatoli ho Diresaun Nasionál Diseminasaun Informasaun (DNDI) atu utiliza viatura hirak ne’e ho kuidadu iha ámbitu servisu nian.

Iha tinan ne’e, MRLAP hola karreta lima, rua ba Tatoli, ida ba DNDI no rua ba Millennium Challenge Corporation (MCC) ho totál orsamentu hamutuk rihun $143.

“MRLAP sosa karreta lima ho osan mil $143 maibé ba motorizada, ha’u ladún iha informasaun maibé sosa de’it motorizada tolu” Ponciano informa.

Antes ne’e, governu halo konkursu públiku, hahú kedas hosi abríl, iha kompañia lima maka hato’o sira nia proposta maibé rezultadu finál, iha empreza rua maka fornese karreta, ida maka kompañia Ensul no ida seluk maka Auto Timor-Leste. Hosi kompañia rua ne’ebé hetan autorizasaun hosi governu ho razaun tanba presu mínimu.

Iha parte seluk, Prezidente Ajénsia Notisioza Timor-Leste-Tatoli,IP, José da Costa, lori ekipa TATOLI nia naran agradese ba Governu tanba bele apoia ona Tatoli ho viatura sira, nune’e jornalista sira bele hala’o servisu di’ak liután kuandu bá munisípiu sira.

José re afirma pozisaun SECOMS nia ne’ebé hato’o beibeik ona atu apoia Tatoli, nune’e ohin marka importante iha jornada Tatoli atu iha fasilidade rasik hodi kontribui ba dezenvolvimentu institusionál.

“Jornalista sira bele uza veíkulu hirak ne’e bainhira halo viajen bá munisipiu”, salienta.

Prezidente adianta katak bá oin nesesidade barak liután, maibé viatura ohin hatudu ona pasu importante oinsá maka TATOLI bele hakat bá oin.

“Ohin iha karreta rua ho motor tolu ne’ebé sira entrega mai ita, karreta hirak ne’e ita sei uza hanesan karreta operasionál ne’ebé atu apoia kolega jornalista sira hodi halo kobertura” tenik.

Entretantu, iha periodu tinan haat nia laran, José afirma katak sei konsentra ba dezenvolvimentu institusionál no expansaun konteúdu.

Jornalista : Zezito Silva

Editora : Maria Auxiliadora

HAKEREK NO HATÁN

Please enter your comment!
Please enter your name here