Prezidente Federasaun Natasaun Timor-Leste (FNTL), Laurentino Guterres

DILI, 16 Jullu 2019 (TATOLI)—Prezidente Federasaun Natasaun Timor-Leste (FNTL), Laurentino Guterres hateten dadaun ne’e sira-nia parte iha difikuldade ba fasilidade hodi hala’o treinamentu.

“Ami husu ba Governu se bele tau atensaun netik ba desportu hotu iha Timor-Leste la’ós desportu natasaun (nani) de’it maibé desportu hotu. Ami-nia ema barak atu partisipa eventu internasionál maibé fasilidade mak susar loos ba ami atu treinu,” tenik Laurentino ba Agência Tatoli, ohin, iha edifísiu Komité Olímpiku Nasionál Timor-Leste (CONTL-sigla Portugês).

Nia dehan, durante ne’e, FNTL hetan tulun hosi Federasaun Natasaun Internasionál maibé la sufisiente. “Ami federasaun osan laiha liu. Kuandu ba partesipa iha eventu sira internasionál ne’e billeti hola hosi Federasaun Internasionál. Kona-ba farda ba atleta atleta sira uza frada tuan de’it no fasilidade ba ami susar loos,” nia haktuir.

FNTL dadaun ne’e iha asosiasaun ida iha Baucau no totál atleta hamutuk 120 maibé atleta na’in 80 de’it mak FNTL haree iha potensiál hodi reprezenta Timor-Leste iha eventu internasionál ruma.

Laurentino informa katak Federasaun barak halo proposta hato’o ba Governu liliu Sekretaria Edtadu Juventude no Desportu (SEJD) maibé FNTL to’o agora la hetan informasaun nune’e bele submete mós proposta hodi husu tulun orsamentu.

“Kona-ba atu halo proposta ba Governu hodi husu ajuda finansiamentu ne’e ami la hatene. To’o agora ami nunka hetan informasaun ruma mak ami la halo proposta ba Governu,” nia tenik.

Nia haklaken katak, atleta barak hakarak tebes hala’o treinamentu hodi sai atleta Natasaun maibé kondisaun fasilidade hanesan pisina mak laiha. “Ema barak hakarak sai atleta Natasaun maibé fasilidade mak la ajuda. Hanesan ami haree ona pisina ida iha Motael ne’e mós ida ne’e tama tiha ba misaun nian. Só ami uza  pisina Baucau no Hotel Golgota nian ba hala’o treinamentu,” nia esplika.

Jornalista: Hortençio Sanchez

Editór: Xisto Freitas

Lee mós notísia ida ne’e:

  1. Aban, Atleta Natasaun Tolu Aranka ba Koreia Súl

HAKEREK NO HATÁN

Please enter your comment!
Please enter your name here