Prezidente Konsellu Administrasaun BNCTL, Brigido de Sousa. Imajen Egas Cristovao

DILI, 16 jullu 2019 (TATOLI)-Prezidente Konsellu Administrasaun Banku Nasionál Komérsiu Timor-Leste (BNCTL-sigla portugés), Brígido de Sousa, hatete BNCTL iha ona vontade atu partisipa iha eskema garantia kréditu, maibé eskema ne’e rasik seidauk implementa tanba Banku Sentrál Timor-Leste (BCTL, sigla portugés) sei prepara regulamentu no sistema.

Brígido de Sousa dehan BNCTL hanesan banku dahuluk ne’ebé deklara atu partisipa iha eskema garantia kréditu ne’ebé sei jere hosi Banku Sentrál Timor-Leste.

“Osan ne’e prevee iha Orsamentu Jerál Estadu tinan 2017, millaun haat, ne’e atu sai eskema garantia de’it ne’ebé banku sentrál mak jere no banku seluk hakarak, bele partisipa. Agora daudauk, tarde uitoan tanba banku sentrál presiza prepara regulamentu, mekanizmu ho sistema, no banku sira seluk seidauk partisipa tanba sei liuhosi diskusaun ho BCTL, tanba banku balu hakarak partisipa balu lakohi’’, Brígido de Sousa dehan ba TATOLI iha nia kna’ar fatin Timor Plaza, tersa (16/7/2019).

Brígido salienta, daudaun ne’e eskema garantia bele dehan tama ona iha faze finál no nu’udar banku primeiru ne’ebé deklara ona katak sei partisipa implementa eskema garantia kréditu, depois regulamentu sai BNCTL halo diskusaun ho banku sentrál no haruka  prosedimentu internu ba BCTL no banku sentrál prepara hela formuláriu no sistema.

Nia relata iha enkontru foin lalais, BNCTL hakarak bainhira preparasaun ba regulamentu hotu ona, bele halo lansamentu iha fin jullu tinan ne’e ho kliente ne’ebé mak hatama ona proposta ba BNCTL atu hetan kréditu.

Líder másimu BNCTL ne’e afirma, objetivu prinsipál hosi eskema garantia kréditu ne’e atu apoia emprezáriu ki’ikoan sira foka liu ba empreza ki’ik no médiu hanesan iha kapitál serbisu no mós investimentu ba sira-nia negósiu, tanba durante ne’e setór privadu sempre hakilar beibeik katak sira laiha garantia ba jurus, no jurus ne’ebé banku aplika boot.

Tanba ne’e maka Governu hanoin, presiza kria eskema ida para iha osan uitoan atu sai garantia ba empreza sira ne’ebé hatama aplikasaun ba banku ne’ebé hakarak uza sistema garantia. Entaun, banku sei fó kréditu ba sira depende avaliasaun banku nian katak proposta ne’e viavel, nune’e banku haruka aplikasaun ba banku sentrál.

Brígido afirma iha setór haat maka inklui iha eskema garantia kréditu hanesan indústria, turizmu, agrikultura no negósiu. Maibé, hosi área prioridade haat ne’e, sei fahe tan hanesan iha agrikultura ho jurus kada tinan porsentu ualu.

Daudaun ne’e, Brígido dehan, iha ona empreza balu maka hatama proposta hodi aplika ba eskema garantia kréditu. Proposta másimu lima maka bele kobre hosi eskema ne’e.

Notísia relevante : Banku Tolu Interese Implementa Sistema Garantia Kréditu

Governu Prevé Millaun U$4 Ba Eskema Garantia Kréditu

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here