Sekretáriu Autoridade Munisipál Dili, José Filipe Ximenes Smith

DILI, 16 jullu 2019 (TATOLI)-Dili hanesan kapitál nasaun Timor Leste presiza duni ambiente ida ne’ebé saudavel no ijiene. Tanba ne’e, serbisu Administrasaun Munisípiu Dili kontinua halo esforsu hodi halo limpeza iha Dili laran, inklui implementa lejizlasaun sira ho rigór atu abitante sira la bele soe fo’er arbiru no husik animal hakiak la’o livre iha estrada públiku.

Espesialmente, ba preparasaun festa konsulta populár ba dala-20 (30 Augusto 1999-30 Augusto 2019),  Autoridade Munisípiu Dili iha kna’ar boot atu bele garante Dili livre husi fo’er hodi bele asegura Timor nia furak no Timor nia imajen  iha konvidadu internasionál sira nia futar matan.

Adjuntu Autoridade Munisípiu  Dili, José Filipe Ximenes  Smith, ohin, informa katak, sira nia parte kolabora ho Polisia Nasionál Timor Leste (PNTL) no FALINTIL-Forsa Defeza Timor Leste (F-FDTL) hodi mobiliza limpeza jerál iha Dili laran iha sesta-sesta, inklui halo operasaun ba fatin sira ne’ebé la pertense ba atividade negósiu ambulante.

 “Komemorasaun loron konsulta popular ne’e atividade hotu-hotu konsentra iha Munisípiu Dili entaun preparasaun Munisípiu Dili nian mak só halo limpeza de’it,” informa  José Filipe Ximenes Smith, ba jornalista iha Postu Administrativu Dom Aleixo, Fatuhada.

“Ita hakarak molok 30 Augusto, pelumenus Dili organizadu ona no livre husi fo’er,” afirma José Smith.

Nia husu ba vendedor sira ne’ebé halo atividade negósiu iha estrada dalan protokolu nia ninin sira tenke kuidadu no labele soe fo’er arbiru nune’e mós nia dehan labele halo uma ba fatin ne’ebé mak la’ós pertense negosiante sira nian.

 Jornalista :  Osória A. Marques

Editór         : Francisco Simões

 

HAKEREK NO HATÁN

Please enter your comment!
Please enter your name here