Prezidente Konsellu Administrasaun Banku Nasionál Komérsiu Timor-Leste (BNCTL), Brígido de Sousa. Imajen TATOLI/Jogerjo Guterres.

DILI, 16 jullu 2019, (TATOLI)-Banku Nasionál Komérsiu Timor-Leste (BNCTL-sigla portugés) planeia ona atu estabelese kartaun Automated Teller Machine (ATM) P24 ba kliente hotu ne’ebé utiliza kartaun ATM BNCTL nian.

“Ami iha planu hamutuk ho banku seluk atu enkaixa sistema ida ne’ebé BCTL prepara hela hanesan P24 ne’e, signifika katak karik BNCTL iha ATM barak liu iha fatin hothotu, entaun kliente banku seluk bele uza fasilidade BNCTL nian, maski sira-nia banku rasik iha munisípiu iha, maibé sira mós bele uza’’, Prezidente Konsellu Administrasaun BNCTL, Brígido de Sousa, hatete ba Tatoli iha nia kna’ar fatin Timor Plaza, ohin.

Aléinde ne’e, nia dehan BNCTL estabelese ona mákina ATM hamutuk 30 iha territóriu Timór, maibé seidauk sufisiente.

“Aleinde iha Dili, munisípiu hotu inklui RAEOA mós iha. Kada munisipiu ida iha mákina, ne’e sei tau de’it ida, maibé haree ba nesesidade maka sei aumenta tan”, Brígido hatete.

Tanba númeru ne’e seidauk sufisiente maka planeia ona iha tinan ne’e atu aumenta mákina ATM 10 ne’ebé sei tau iha munisipiu Baukau, Ainaru iha Postu Administrativu Maubisi, Bobonaru iha pouzada Balibó, Rejiaun Autónoma Espesiál Oekusi Ambenu (RAEOA), no loja sira tanba númeru nesesidade boot.

“Ami hakarak aumenta tanba ema komesa uza kartaun mós hahú aumenta. Daudaun ne’e, kliente uza kartaun BNCTL kuaze rihun 35 no tranzasaun kada fulan besik millaun $10. Fulan neen nia laran BNCTL halo tranzasaun liuhosi kartaun ATM millaun $50”, Brígido relata.

Jornalista: Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here