Prezidente Konsellu Administrasaun Banku Nasionál Komérsiu Timor-Leste (BNCTL), Brígido de Sousa. Imajen TATOLI/Jogerjo Guterres.

DILI 16 jullu 2019, (TATOLI)-Prezidente Konsellu Administrasaun Banku Nasionál Komérsiu Timor-Leste (BNCTL-sigla Portugés), Brígido de Sousa, husu ba idozu no invalidés atu labele ansi bá foti osan iha banku.

“BNCTL husu no koordena ho autoridade lokál sira atu aviza no fó hatene ba idozu sira katak lalika ansi atu bá foti osan tanba osan la lakon. Uluk ami rona katak idozu sira hakarak mai foti sira-nia osan lalais tanba sira ta’uk katak se sira la mai foti iha loron termina maka sira-nia osan lakon ona, filafali ba kofre Estadu”, Brígido de Sousa hatete ba Tatoli iha nia kna’ar fatin, Timor Plaza, ohin.

Tanba ne’e, nia dehan informasaun ne’e laloos tanba osan kuandu tama ona ba konta titulár, konta bele foti kualkér tempu.

Brígido esplika bainhira osan filafali ba kofre Estadu kuandu ema ida na’in ba konta laiha ona, no laiha ema ida maka reprezenta, tanba tuir lei banku labele foti fali ema ida nia osan hatama ba kofre Estadu, tanba ne’e hanesan ona direitu ba ema ida nian.

Ho informasaun laloos sira ne’e maka halo idozu no invalidés sira hakarak bá forma sedu iha banku hodi foti osan.

“Ba sira ne’ebé moras no labele la’o, entaun sira-nia família fó de’it naran ba xefe suku sira ka xefe aldeia katak idozu ho naran ne’ebé iha moras, labele la’o, nune’e autoridade lokál sira informa fali ba BNCTL katak iha suku ne’e iha ema moras, entaun banku sira alista ema moras sira ne’e, sei bá halo pagamentu to’o iha sira-nia uma”, Brígido esplika.

Aléinde banku halo pagamentu iha edifisiu, halo mós pagamentu ho transporte movel iha munisípiu, suku, aldeia no sira ne’ebé hela iha área remota.

“Ami hala’o atividade pagamentu movel ne’e dezde tinan 2011 bainhira BNCTL hetan fiar hosi Governu hodi halo pagamentu ba idozu sira. Ami bele halo esforsu, maibé filafali ba disiplina idozu sira nian no mós autoridade lokál sira hodi hato’o informasaun ba benefisiáriu sira, tanba maski ami halo esforsu hotu mas laiha informasaun klaru mós situasaun sei akontese”, nia subliña.

Brígido de Sousa dehan tinan ida, BNCTL halo pagamentu ba idozu no invalidés hamutuk dala rua, kada fulan neen. Iha tinan ida simu subsídiu hamutuk $360, tanba fahe ba rua entaun $180 kada períodu.

“Agora daudauk, banku halo hela pagamentu ba idozu no invalidés sira iha territóriu tomak. Kona-ba sistema pagamentu laiha mudansa signifikativu, maibé ami serbisu hamutuk mós ho autoridade lokál sira  atu asegura katak idozu sira simu sira-nia direitu tuir ida-idak nia suku para nune’e evita idozu hothotu labele mai forma naruk iha banku, tanba daudaun ne’e númeru idozu hamutuk rihun 97”.

“Ho númeru ne’ebé maka barak se la jere ho di’ak hanesan akontese pagamentu iha tinan uluk idozu no invalidés sira hotu bá iha banku, entaun tenke dudu malu no ida ne’e ladún di’ak ba sira nia saúde”.

Tanba ne’e BNCTL koordena ho autoridade lokál sira atu hasai oráriu katak suku ida-idak simu iha loron la hanesan, nune’e idozu sira ba tuir sira-nia loron, nune’e sira labele bá hein kleur.

http://www.tatoli.tl/2019/07/idozus-rihun-97-simu-subsidiu/

Jornalista: Antónia Gusmão

Editora : Maria Auxiliadora

1 KOMENTÁRIU

  1. Persija Sistema Atendimento (Promove Atm / Monta ATM cada Posto Adm.), Labele Ansi Foti Osan no Monta Tenda ba antrian laos solusaun + ita hare tinan barak Problema Antrian ne mosu, mb too agora nafatin laiha Mudansa. Obrigado e Abc

HAKEREK NO HATÁN

Please enter your comment!
Please enter your name here