Mapa mina no gás iha tasi Timor. Imajen hosi google

DILI, 16 jullu 2019 (TATOLI)—Prezidente Autoridade Nasionál Petróliu no Minerál (ANPM), Gualdinho da Silva hateten Proposta Alterasaun Lei nú.7/V kona-ba Rejime Laborál no Migrasaun Espesiál ne’ebé aplika iha projetu Bayu-Undan sei fó protesaun dignu ba traballadór timoroan.

“Bainhira Fronteira Marítima tama iha vigór, Lei Rejime Laborál no Migratóriu Espesiál sei fó protesaun dignu ba ita-nia traballadór timoroan sira ne’ebé serbisu iha projetu Bayu-Undan no sei regula mós kontratante sira,” tenik Prezidente ANPM iha audisaun konjunta entre Komisaun B, C no D ho Governu no Negosiadór Prinsipál ba Delimitasaun Fronteira Marítima, Kay Rala Xanana Gusmão ho ninia ekipa, iha plenária, tersa (16/7).

Nia esplika, Lei Laborál sei haree liu-ba relasaun serbisu entre kontratante ho timoroan sira ne’ebé serbisu iha projetu Bayu-Undan, enkuantu Lei Migratóriu ko’alia kona-ba emisaun vistu kontratante ho traballadór ne’ebé serbisu iha projetu Bayu-Undan.

“Rejime rua ne’e mak kobre iha proposta lei ida ne’e. Lei ne’e iha artigu 1 to’o 12, ne’ebé ko’alia kona-ba Rejime Laborál Espesiál. Artigu ne’e mós sei aplika no eziste ho Kódigu Laborál ne’ebé oras ne’e iha ona,” nia akresenta.

Nune’e mós, nia esplika, iha artigu 13 to’o 15, ko’alia kona-ba  Rejime Migratóriu Espesiál, ninia aplikasaun eziste ho Lei Migratóriu, ne’ebé sei jere traballadór timoroan ho empregadór ka kontratante sira. Lei ne’e mós regula traballadór sira hosi estranjeiru, katak bainhira ema ne’e mai hosi Filipina, sei aplika rejime Laborál Filipina nian. Nune’e mós ba Timor-Leste.

“Ba traballadór hotu-hotu iha Bayu-Undan ne’ebé mak serbisu iha rai-maran, bele timoroan no bele estranjeiru, aplika Lei Traballadór Timor-Leste nian, laiha diferensa ba nasionalidade”, nia tenik.

Nia salienta, iha alterasaun lei rua ne’e mós sei aplika lian ofisiál Tétun no Portugés, tanba antes ne’e kontratu hotu-hotu uza lian inglés, nune’e traballadór timoroan sira bele kompriende konteúdu kontratu hosi kontratante.

Gualdinho informa, alterasaun lei ne’e fó dalan ba traballadór timoroan sira iha rotasaun ba féria, katak semana haat serbisu no semana haat bele deskansa.

Iha artigu 6 hosi lei ne’e, nia subliña, ko’alia mós kona-ba renumerasaun no protesaun ba traballadór timoroan sira, tanba antes ne’e sira la deskansa no artigu ne’e mós fó protesaun ba saláriu bainhira deskansa.

Jornalista: Evaristo Soares Martins

Editór: Xisto Freitas

Notísia Relevante:

PN Aprova Pedidu Debate Karáter Urjénsia Ba Proposta Lei Haat

Aprovasaun Lei Haat Sei Hetan Benefísiu Hosi Ratifikasaun Tratadu Foun

HAKEREK NO HATÁN

Please enter your comment!
Please enter your name here