Abitante suku Maluru simu bainaka sira ho tebedai iha ámbitu sosializasaun no lansa programa identifikasaun rai iha área Timor-Leste LNG, ohin, iha Postu Administrativu Vikeke Villa, Munisípiu Vikeke. Imajen/MOP.

DILI, 16 jullu 2019 (TATOLI)-Abitante suku Maluru, Postu Administrativu Vikeke Villa, Munisípiu Vikeke, apoia Governu atu harii Planta Liquefied Natural Gas (LNG) iha Beasu.

Diretór Unidade Negósiu no Gás TIMOR GAP, Domingos Lequi Siga Maria, informa iha sosializasaun no lansa programa identifikasaun rai iha área Timor-Leste LNG, ohin (16/07), rezidente suku Maluru entuziazmu maka’as no hakarak atu loke Planta LNG iha área Beasu.

“Ita-nia komunidade sempre apoiu no prontu atu muda hela fatin, rai, plantasaun no ai-horis importante mak sira (abitante) husu atu halo uma ba sira ka halo bairru foun ho kondisaun dignu,” dehan diretór ne’e ba ajénsia Tatoli via telemovel.

Nia esplika, hafoin lansamentu ne’e ekipa interministeriál sei hala’o identifikasaun no mapeamentu ba komunidade nia uma, rai no ai-horis sira ne’ebé afetadu ba Planta LNG.

Domingos Lequi Siga dehan prosesu foti dadus ne’e sei hanesan Planta LNG ne’ebé halo ona iha Suai. “Ita alista hotu dadus no mapeamentu, ekipa ministeriál verifika no asina mak foin bele halo kompensasaun ba komunidade atu husik rai hirak ne’e atubele harii Planta LNG ho prepara ba Projetu Greater Sunrise”.

Nia hatutan, ba planta LNG ne’e sei presiza rai ektare 600 no komunidade mós hatudu rai ektare 400 atu harii bairru foun.

Kona-ba abitante hira mak afeta “ami seidauk identifika hira no osan hira bá halo kompensasaun, maibé ita foti dadus lai”, nia katak.

Notísia relevante : http://www.tatoli.tl/2019/07/timor-gap-sosializa-benefisiu-projetu-lng-ba-komunidade-vikeke/

Jornalista: Florêncio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here