Halte. Foto/Google.

DILI, 16 jullu 2019 (TATOLI)–Tinan oin, Diresaun Nasionál Transporte Terrestre (DNTT) sei estabelese “halte” ka parajen ba transporte hotu.

“Ami seidauk halo halte, maibé sinál ba halte ami tau hotu ona” dehan Xefe Departamentu Tráfegu hosi DNTT, João Eugénio ba Tatoli, iha nia servisu fatin, Balidi, ohin.

Nia rekoñese katak DNTT to’o agora seidauk halo koordenasaun ho Polisia Nasionál Timor-Leste (PNTL) atu fó atensaun ba kestaun parajen maski iha ona sinál ba ida ne’e.

“To’o agora DNTT seidauk koordena ho polisia hodi kontrola ba transporte sira bainhira la para tuir sinál ne’ebé prepara ona”.

Iha tinan kotuk, DNTT ho Ministériu Estatál liuhosi diresaun urbanu halo ona planu hodi identifika fatin ne’ebé atu tau halte sai hanesan projetu pilotu ida, maibé to’o agora la la’o tanba orsamentu 2018 la sufisiente, maibé 2020 sei lansa halte hodi nune’e bele regula transporte sira.

“Ha’u simu ona orientasaun hosi ha’u-nia diretór, ami prepara ona dezeñu atu halo halte no orsamentu sei iha prosesu laran” tenik.

 Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here