Diretora KI na'in rua nu'udar arguida, konversa hela ho sira-nia advogada iha Tribunál Distritál Dili. Dokumentasaun Tatoli/ Domingos Piedade Freitas

DILI, 15 jullu 2019 (TATOLI)–Uza karreta Estadu nian ba Kúpaun-Indonézia ho objetivu privadu, ohin, Tribunál Distritál Dili (TDD) halo audiénsia julgamentu ba Diretora Ezekutiva Konsellu Imprensa (CI-sigla portugés) ho inisiál ATS no Diretora Rekursu Umanu CI nian ho inisiál LVM.

Tuir akuzasaun hosi Ministériu Públiku katak, iha loron 6 dezembru 2018, arguida ho inisiál LVA, nu’udar Diretora Rekursu Umanu iha CI, halo pedidu ida ba Diresaun Nasionál Transporte no Terrestre (DNTT) husu atu uza karreta estadu ho marka RAV, ho númeru matríkula 06-0377 G atu ba halo serbisu ida iha Kúpaun, Indonézia.

Tuir akuzasaun MP nian ne’e, arguida uza nia kompeténsia nu’udár diretora Rekursu Umanu, maibé la aneksa ho konvite ruma. Antes ne’e, Diretora Ezekutiva ho inisiál ATS delega nia kompeténsia ba Diretór Apoiu Jurídiku no Étika Liberdade Imprensa, Olderico A. da Costa, atu asumi Diretór Ezekutivu Interinu tanba diretora ATS iha lisensa anuál.

Iha loron 10-14 dezembru 2018, tuir akuzasaun MP nian, diretora RH haruka formuláriu ida ba diretór interinu atu asina dokumentu viajen ne’ebé nota atu halo konsulta ba labarik moras no la mensiona katak atu halo serbisu, mak momentu ne’ebá diretór interinu la asina hodi fó fila ba diretora ezekutiva (ne’ebé halo hela lisensa anuál) mak asina no aprova.

Tuir aktu ne’ebé prodúz iha akuzasaun MP nian ne’e katak, depois aprova iha loron 11 dezembru, diretora na’in rua ba pasa féria iha Kúpaun, ho karreta estadu nian. Tanba ne’e, MP akuza krimi rua mak hanesan krime abuzu podér iha artigu 297 no pekulatu uzu iha artigu 296 kódigu Penál Timor-Leste.

Iha audiénsia julgamentu, arguida ho inisiál ATS deklara ba Tribunál katak momentu ne’ebá husu hela lisensa anuál, no nia mak aprova duni, maibé atu ba Kúpaun, koinsidente (kebetulan) diretora LVM ba Kúpaun mak sa’e tuir de’it, la’ós halo akordu entre nia ho diretora LVM.

Arguida mós arrepende ba ninia hahalok iha Tribunál tanba antes ne’e serbisu iha ONG internasionál no ladún hatene prosesu sira ne’e. Iha depoimentu, arguida ho inisiál ATS konfesa ba Tribunál katak momentu ne’ebá uza duni karreta estadu ba hala’o serbisu CI nian iha Kúpaun, aumezmu tempu konsulta no haree labarik moras.

“Ha’u ho arguida ho inisiál ATS laiha kombinasaun. Momentu ne’ebá ami ba mak hanesan ha’u rasik mak kondutór, ha’u nia oan, inklui mós Diretora Ezekutiva,” hateten arguida LVM.

Nia hatutan, karreta ne’ebé nia parte lori, nia rasik mak enxe mina no kondisaun karreta di’ak hotu. Arguida mós konfesa katak sei la halo tan hahalok ne’e iha futuru tanba sai hanesan lisaun ba nia atu bele uza patrimóniu estadu tuir nia dalan.

Entretanu, João Paulo, nu’udar Fiskál Úniku (FU) CI nian hanesan mós sasin iha audiénsia hateten, arguida na’in rua la hetan karta autorizasaun hosi superiór bainhira hala’o viajen ba Kúpaun. Nia fo sasin katak baibain CI hetan konvite hosi nasaun seluk tenke lori uluk ba plenária hodi aprova kona-ba sé mak reprezenta CI atu responde konvite ne’e.

Audiénsia julgamentu ne’e prezide hosi juiz Yude Pamungkas, Ministériu Públiku reprezenta hosi prokuradór Adérito Tilman no arguida na’in rua hetan asisténsia legál hosi advogadu privadu, Celestina Afonso ho Elda Gomes.

Jornalista: Domingos Piedade Freitas

Editór: Xisto Freitas

HAKEREK NO HATÁN

Please enter your comment!
Please enter your name here