Prezidente Parlamentu Nasionál, Arão Noe de Jesus da Costa Amaral. Imajen Tatoli/Egas Cristóvão

DILI, 15 jullu 2019 (TATOLI)—Prezidente Parlamentu Nasionál (PPN), Arão Noé de Jesus da Costa Amaral, simu ona pedidu balun hosi Atoni-oan balun husu extende mandatu Prezidente Autoridade Rejiaun Administrativa Espesiál Oé-Cusse Ambeno (RAEOA), Marí Alkatiri.

Arão Noé simu petisaun ne’e iha sesta (12/7). “Ne’e direitu ema ida-idak nian. Órgaun Parlamentu Nasionál eleitu liuhosi eleisaun antesipada 2018 nian, Parlamentu reprezentante povu, konstituisaun fó dalan ba ida ne’e. Ami sei baixa ba Komisaun A trata Asuntu Konstitusionál no Podér Lokál para halo pareser, maibé ne’e la fó impaktu ba alterasaun lei ne’ebé ba órgaun soberania ida nian,” Arão ko’alia iha Parlamentu Nasionál (PN), segunda ne’e.

Tuir nia, kompeténsia extende mandatu Alkatiri nian iha Primeiru-Ministru, la’ós iha Parlamentu Nasionál (PN). “Parlamentu Nasionál lakohi interfere ba ida ne’e,” tenik PPN ne’e.

Iha oportunidade ne’e, deputadu bankada PD, Mariano Assanami Sabino, afirma, uluk diskusaun ba títulu Prezidente RAEOA ne’e hanesan vise primeiru-ministru, sekretáriu sira hanesan sekretáriu estadu.

“Uluk hanoin dehan ministru juniór, tanba Oé-Cusse konstituisaun fó dalan tratamentu espesiál. Tanba ne’e, PD la aseita hatuun estatutu Oé-Cusse hanesan fali munisípiu sira seluk. Ida ne’e PD kontra tanba la tuir konstituisaun,” Assanami realsa.

Nia subliña, atu troka malu ne’e buat seluk, maibé estatutu hanesan Zona Espesiál no Sosiál Merkadu ne’e konstituisaun mak fó. Nia afirma, iha rai ida ne’e ema ne’ebé iha autoridade atu jere Oé-Cusee fó bensa hosi Prezidente Repúblika.

“Instituisaun RAEOA labele trata hanesan TVTL ka hanesan Ajénsia Estatál sira, katak ida ba ladi’ak muda tuir ita-nia hakarak, ne’e labele,” nia informa.

Nia akresenta, loloos ne’e governu ida sa’e tenke fortifika, fortalese no haforsa instituisaun ne’e sai metin. Nune’e mós fó kualidade ba padraun, la’ós ba sobu fali padraun.

“Governu mak atu fó fali pose ne’e loloos labele, tanba ne’e autoridade. Ne’e lei espesiál. Ita labele muda sasán tuir ita-nia hakarak,” katak Assanami, iha resintu PN.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here