Sesaun plenária iha Parlamentu Nasionál. Imajen dok. Tatoli

DILI, 15 jullu 2019 (TATOLI)—Parlamentu Nasionál (PN) liuhosi reuniaun líder bankada sira, aprezenta ona relatóriu pareser hosi komisaun tolu kona-ba Proposta Lei haat hosi Governu no hosi reuniaun ne’e iha pedidu debate ho karáter urjénsia.

Prezidente Parlamentu Nasionál (PPN), Arão Noe de Jesus da Costa Amaral informa komisaun B, C no D aprezente ona relatóriu pareser iha reuniaun líder bankada no husu debate ba Proposta Lei haat hosi Governu ho karáter urjénsia, nune’e iha lorokraik ne’e sei iha sesaun plenária hodi halo apresiasaun hodi fiksa sekuénsia debate.

“Se aprova iha plenária ba pedidu urjénsia ne’e maka sekuénsia ba debate nian sei la kumpri regra rejimentál, liliu kestaun tempu. Ohin líder bankada mós halo apresiasaun no aprova ona kalendáriu ida to’o aprovasaun finál global,” dehan PPN iha resintu Parlamentu Nasionál (PN), segunda ne’e.

Arão hateten, bainhira diskusaun proposta lei mak tuir kalendáriu ne’ebé PN fiksa ona, entaun iha loron 26 jullu PN sei haruka ba Prezidente Repúblika (PR), Francisco Guterres Lú Olo atu hetan promulgasaun.

Nia mós dehan, bainhira plenária desidi debate ho karáter urjénsia, aban sei iha audiénsia komisaun hodi prepara relatóriu no baintolu sei iha plenária estraordinária para debate jeneralidade ba proposta lei haat, hafoin baixa fali ba komisaun hodi halo debate iha espesialidade.

PPN akresenta, hafoin konklui debate espesialidade, komisaun C, D ho B aprezenta textu finál iha plenária hodi halo debate no halo aprovasaun ba finál globál hafoin haruka ba Prezidente Repúblika.

Nia dehan tan, tratadu ne’e asina iha loron 6 marsu 2018 no antes ne’e tinan ida resin Governu liuhosi Xefe Negosiadór Prinsipál ba Delimitasaun Fronteira Marítima, Kay Rala Xanana Gusmão ho ninia ekipa halo negosiasaun ho Austrália no kompañia operdór petrolífera sira iha Tasi Timor, hodi armoniza lejizlasaun sira.

Arão subliña, Austrália iha semana kotuk informa tenke halo revizaun ba lei 26 nu’udar rekizitu atu halo ratifikasaun ba Tratadu Fronteira Marítima, enkuantu Timor-Leste iha lei 4 atu halo alterasaun.

Nia haklaken, tuir konstituisaun, fó tempu ba PR iha loron 30 nia laran hodi halo apresiasaun, promulgasaun ka veta, tanba ne’e PN hakarak halo pedidu urjénsia atu iha loron 26 jullu bele manda ona ba Xefe Estadu.

“Ita iha ona kompromisu ho Austrália katak iha dia 30 agustu ita troka nota entendimentu entre estadu rua, Timor-Leste ho Austrália, Parlamentu Nasionál konsidera ida ne’e interese nasionál,” nia dehan tan.

Maski nune’e, nia dehan aprova ka lae ne’e depende ba desizaun plenária, PPN hanesan jere pedidu ne’ebé tama ba meza no halo prosesu tuir rejimentu.

 Entretantu, Proposta Lei haat ne’ebé PN sei halo diskusaun mak hanesan alterasaun dahuluk Lei nú.8/2008, 30 juñu, alterasaun dahuluk Lei nú. 3/2003, 1 jullu kona-ba Tributasaun Kontratante Bayu-Udan sira no alterasaun dahuluk Lei nú.4/2003, 1 jullu, kona-ba Dezenvolvimentu Petróliu Tasi Timor (Estabilidade Tributária), Proposta Lei ne’ebé aprova Rejime Laborál no Migratóriu Espesiál Aplikável ba Projetu Bayu-Undan.

Nune’e mós Proposta Lei ne’ebé aprova alterasaun daruak Lei nú.13/2005, 2 setembru, ne’ebé aprova Lei Atividade Petrolífera no ikus liu Proposta Lei ne’ebé aprova alterasaun datoluk Lei nú.9/2005, 3 agustu ne’ebé aprova Lei Fundu Petrolíferu.

Lei hirak ne’e integradu ho akordu Fronteira Marítima ne’ebé governu Timor-Leste ho Austrália asina ona iha 6 marsu 2018, tanba ne’e alterasaun ba lei haat ne’e akontese tanba iha mudansa ba rejime hosi tratadu Tasi Timor ne’ebé asina ona no tratadu foun ne’ebé atu ratifika iha 30 agustu 2019.

Komisaun hirak ne’ebé involve iha reuniaun líder bankada ne’e hanesan Komisaun C trata Finansa Públika, Komisaun D trata Asuntu Ekonomia no Dezenvolvimentu, Komisaun B trata Asuntu Defeza, Seguransa no Negósiu Estranjeiru.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here