Sesaun plenária iha Parlamentu Nasionál. Imajen dok. Tatoli

DILI, 15 jullu 2019 (TATOLI)—Parlamentu Nasionál (PN) liuhosi sesaun plenária, segunda ne’e, aprova ona pedidu komisaun B, C, no D, hodi halo debate ho karáter urjénsia ba proposta lei haat no rezolusaun ida hosi Governu, ho votu a-favór 44, kontra 22 no abstensaun 1, ho aprovasaun ne’e diskusaun sei la’o ho tempu lais liu-tan.

Nune’e, bazeia ba ajenda ne’ebé iha, Komisaun B, C no D sei halo audiénsia públika ho Govenu no mós Xefe Negosiadór Prinsipál ba Delimitasaun Fronteira Marítima, Kay Rala Xanana Gusmão ho ninia ekipa.

Xefe Bankada FRETILIN, Aniceto Guterres konsidera presiza halo loos rekerimentu ba pedidu hosi bankada ho karáter urjénsia.

“Tanba ne’e inisiativa Governu, entaun tuir inisiativa ne’e Governu mak tenke husu. La’ós deputadu mak hanoin fali dehan ne’e urjente hodi hatama rekerimentu. Uza maioria hakarak vota, loos no bele liu tanba imi mak maioria maibé interpretasaun tenke halo loos,” nia tenik durante sesaun plenária.

Deputadu bankada opozisaun ne’e realsa, bainhira iha karáter urjénsia, entaun deputadu ida bele iha inisiativa ba projetu, tanba ne’e tenke hatama projetu mak foin husu debate urjénsia.

Tuir Aniceto, artigu 97 alínea 3 no 4 la fó dalan ba lei hirak ne’ebé Governu submete ona, atu PN trata ho karáter urjénsia, tanba ne’e Bankada Fretilín ezije trata tuir rejimentu.

Prezidente Komisaun C ne’ebé trata asuntu Finansa Públika, Fernanda Lay, esplika lei haat ne’ebé Governu submete tenke debate ho karáter urjénsia tanba asuntu interese nasionál.

“Se tratadu ne’e la-asina iha 30 agustu 2019, ita-nia osan atraza nafatin. Ita lakohi osan tama ba ita-nia fundu? Ha’u hanoin laiha lei ida mak perfeitu, maibé pedidu ne’e hosi Austrália no ita mós konkorda, tanba ne’e mak dada to’o fulan 16,” dehan deputada bankada CNRT ne’e.

Iha fatin hanesan, deputadu bankada PD, Mariano Assanami Sabino hateten luta ba Delimitasaun Fronteira Marítima ne’e bankada PD sempre fó apoia.

“PD dezde hamriik ho prinsípiu sempre fó apoia di’ak ba estadu, di’ak ba povu ida ne’e,” nia afirma.

Enkuantu, bankada seluk hanesan PLP, KHUNTO, UDT/FM no PUDD fó apoia tomak atu nune’e proposta lei no rezolusaun hirak ne’e bele debate ho karáter urjénsia.

Proposta lei haat ne’ebé sei debate ho karáter urjénsia mak hanesan proposta lei 4/V, alterasaun ba lei nú. 13/2005 2 setembru, kona-ba Lei Atividade Petrolífera, proposta lei nú. 3/V, sei halo alterasaun ba lei númeru 9/2005, 3 agustu kona-ba Lei Fundu Petrolíferu.

Nune’e mós proposta lei 6/V, sei altera lei nú. 8/2008 30 juñu kona-ba lei tributária nian, alterasaun dahuluk ba lei nú. 3/2003, 1 juñu kona-ba tributasaun kontrante Bayu-Undan, no alterasaun dahuluk ba lei nú. 4/2003 1 jullu, kona-ba dezenvolvimentu petróleu iha tasi Timor (estabilidade tributária) no ikus liu proposta lei nú.7/V, kona-ba rejime laborál no migrasaun espesiál apliká iha projetu Bayu-Undan.

Aleinde ne’e, iha mós rezolusaun ida nú. 2/V, kona-ba ratifikasaun entre Repúblika Demokrátika Timor-Leste (RDTL) ho Austrália, ne’ebé estabelese Fronteira Marítima iha Tasi Timor.

Jornalista: Evaristo Soares Martins

Editór: Xisto Freitas

.

HAKEREK NO HATÁN

Please enter your comment!
Please enter your name here