Diretór DGAS-MOP, Gustavo da Cruz, lidera hela WASH Forum. Imajen/DGAS-MOP

DILI, 15 jullu 2019 (TATOLI)- Ministériu Obra Públika (MOP) liuhusi Diresaun Jerál Bee no Saneamentu (DGAS, sigla portugés) lidera forum bee, saneamentu no ijiene datoluk iha salaun enkontru UNDP (Programa Nasaun Unida ba Dezenvolvimentu) Kaikoli, Dili, ohin, hodi avalia programa ne’ebé implementa ona husi parseiru dezenvolvimentu sira.

Diretór Jerál Bee no Saneamentu-MOP, Gustavo da Cruz, liuhusi enkontru ne’e hato’o ba parseiru sira katak tuir orientasaun husi Ministru Obra Públika, Salvador Eugénio Soares dos Reis Pires, implementasaun programa bee no saneamentu husi ajénsia sira tenke liuhusi odamatan ida de’it maka DGAS-MOP.

Tanba ne’e, Diretór Jerál ne’e orienta ona atu parseiru sira hotu obrigatóriamente fornese relatóriu implementasaun programa anteriór no planu ba 2020 mai DGAS, hodi nune’e bele relata hikas ba Ministru Obra Públika.

“Objetivu husi enkontru ne’e, atu haree hamutuk programa no orsamentu husi parseiru sira ba implementasaun bee no saneamentu, avalia fila programa hirak ne’ebé mak implementa tiha ona no mós dezafiu saida mak hasoru ba implementasaun programa refere”, katak.

Gustavo  esplika, enkontru ho naran “WASH Forum” nu’udar enkontru regulár ne’ebé organiza husi DGAS-MOP hodi hasoru malu ho parseiru sira ne’ebé mak suporta iha área bee no saneamentu mak hanesan Programa Nasionál Dezenvolvimentu Suku (PNDS) Ministériu Estatál, Ajénsia Internasionál The United Nations Children’s Fund (UNICEF), World Health Organization (WHO), Programa Nasaun Unida ba Dezenvolvimentu (UNDP), Australian Agency for International Development (AusAID), Department of Foreign Affairs and Trade (DFAT), PHD, Banku Dezenvolvimentu Aziátiku (ADB) no Embaixada Japaun, Organizasaun Non Governamentál Internasionál mak Water Aid, Plan Internasional, ADRA no CARE Internasional.

Antes ne’e, DGAS-MOP planeia ona atu halo mapeamentu ba hadi’a kanalizasaun sistema bee-moos atubele fornese ba komunidade sira.

Jornalista: Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here