Sekretáriu Jerál Ministériu Agrikultura no Peska (MAP), Cesar José da Cruz. Foto/MAP.

DILI 15 jullu 2019, (TATOLI)-Sekretáriu Jerál Ministériu Agrikultura no Peska (MAP), Cesar José da Cruz, hatete tuir programa Ministériu Agrikultura no Peska (MAP) sei halo expansaun ba kafé hamutuk ektare 500 iha munisípiu Vikeke no Ermera.

“Expansaun depende ba produsaun, kuandu produsaun ladi’ak no kafé ne’e tuan ona tenke halo reabilitasaun, maibé tenke la’o hamutuk ho komunidade para hodi hatene sira-nia kafé ne’e prodús ka lae”, hateten Cesar José da Cruz ba jornalista sira iha Salaun Kristal, Balidi, ohin.

Tuir Sekretáriu Jerál MAP, importánsia hosi expansaun maka atu hasa’e produsaun tanba bazeia ba dadus MAP katak kada tinan produsaun kafé tonelada rihun 15.

“15 mil tonelada ne’e ami haree ba kafé jerál hanesan kafé sereja ka sei fuan no kafé ne’ebé dulas tiha ona maka esporta. Maibé, agora atu halo reabilitasaun pelumenus hasa’e tan porsentu rua, tanba kafé agora iha merkadu di’ak”, Cesar afirma.

Entretantu, husu kona-ba orsamentu ba expansaun nian, Cesar José dehan prevee ona iha Orsamentu Jerál Estadu (OJE) 2019 iha kategoria bens e servisu.

Iha OJE 2019, orsamentu ne’ebé aloka ba MAP hamutuk millaun $14.709,251 no ba kategoria bens no servisu hamutuk $9,773,520.

Jornalista: Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here