Jurista, Manuel Tilman. Imajen/Domingos Piedade Freitas

DILI, 15 jullu 2019 (TATOLI)–Jurista Timor oan, Manuel Tilman, husu ba ema hot- hotu, liuliu lider sira tenke hatene lei kódigu penal no prosesu penal, nune’e evita deklarasaun oi-oin hasoru juis, prokuradór no defensór.

Tuir Manuel Tilman nia observasaun durante ne’e, mídia sira halo publikasaun hodi foti deklarasaun  ema sira dehan, Tribunal fraku iha implementasaun  lei. Ho nune’e, dala barak, kazu krime organizadu la hetan kondenasaun hodi aplika  prizaun preventiva, maibé hetan fali Termu Identidade de Rezidénsia (TIR).

Manuel Tilman  hateten, desizaun sira ne’ebé Tribunal aplika, la’ós juis foti naranaran, maibé sira foti desizaun tuir orientasaun lei no bazei ba evidénsia no buat hot-hotu  ne’ebé previstu iha kódigu penal no kódigu prosesu penal.

“Desizaun Tribunal depende ba auto notísia husi terrenu,” hateten Mauel Tilman, hodi responde Ajénsia TATOLI, iha nia serbisu fatin, sábadu (13/07/2019).

Manuel Tilman husu atu sidadaun hot-hotu tenke hatene lei kódigu penal no kódigu prosesu penal, atu ko’alia buat ruma karik, pelumenus apár ho lei, nune’e evita fó informasaun hot-hotu ne’ebé la tuir baze legal.

Hatán kona-ba preokupasaun Tribunal koopera ho Polisia,  Manuel Tilman esplika katak, la’os Tribunal mak koopera fali ho Polisia, maibé Polisia mak tenke koopera ho Tribunal, tanba Polisia mak órgaun estadu garante estabilidade iha rai laran.

Nia sujere ba hirak ne’ebé mak hakarak halo intervensaun polítika no administrativa judisiál tenke lee kona ba material krime, kódigu penal no kódigu prosesu penal, se lae siik tun sa’e de’it.

Jornalista           : Domingos Piedade Freitas

Editór                 : Francisco Simões

1 KOMENTÁRIU

  1. W aseita ho sr.Tilman nx esplikasaun nee, mas kazu ida foin lalais soe bebe ih lahane nee, tribunal foti desizaun tuir lei mk hnsn nee ga?????
    Sekarik tebes duni ntaun lei mos haruka ema bele soe bebe arbiru.

HAKEREK NO HATÁN

Please enter your comment!
Please enter your name here