Portavóz CGT-TL, Juvinal Dias (klaran jaz metan) ho nia ekipa ko’alia ho jornalista sira hafoin soru-mutu ho Xefe Estadu Lú Olo. Imajen Tatoli/Hortençio Sanchez

DILI, 15 jullu 2019 (TATOLI)—Ekipa Core Group Tranparancy Timor-Leste (CGT-TL) hasoru malu ho Prezidente Repúblika (PR), Francisco Guterres Lú Olo, hodi aprezenta rezultadu peskiza ne’ebé hala’o durante ne’e ba projetu Kosta-Súl.

Portavóz CGT-TL, Juvinal Dias hateten durante peskiza konsege deskobre preokupasaun balun iha projetu Kosta-Súl, liliu projetu auto-estrada.

“Ohin ami mai atu partilla ba Prezidente Repúblika kona-ba ami nia peskiza ne’ebé durante ne’e halo iha Kosta-Súl, konsege deskobre preokupasaun barak povu nian relasiona ho projetu sira iha ne’ebá hanesan auto-estrada iha Suai ne’e difikulta tebes povu nia movimentasaun,” tenik Juvinal iha Palásiu Prezidente Nicolau Lobato, Bairru Pité, Dili, segunda ne’e.

Tuir nia, projetu auto-estrada ladún konsidera aspetu sosiál no ambientál tanba ne’e sei kria problema boot ba povu.

“Ami hanoin Prezidente Repúblika bele uza nia podér rasik hodi komunika ho Governu atu nune’e bele iha estudu ne’ebé diak, atu projetu sira hanesan iha Suai ne’e bainhira kria tan labele mosu problema hanesan dadauk ne’e.

 “Ita hatene auto-estrada ne’e foin mak halo hosi Suai to’o ba Fatukai, maibé seidauk to’o Viqueque mosu ona lakuna barak. Entaun, karik auto-estrada ne’e kontinua tan ba Viqueque, labele mosu problema tan hanesan iha Suai nian,” nia hatutan.

Problema hirak ne’e, Juvinal informa, nia parte konsege komunika ona Governu liuhosi Ministériu Obra Públika (MOP), maibé seidauk tau atensaun ho sériu, tanba ne’e tempu badak ekipa CGT-TL kontinua hasoru nafatin Governu hodi ko’alia kle’an liu.

Iha biban ne’e, Xefe Estadu konsidera no apresia ho serbisu ne’ebé mak CGT-TL hala’o durante ne’e, no husu atu kontinua serbisu nafatin fó perspetiva no alternativu ba Governu atu foti desizaun.

Jornalista: Hortençio Sanchez

Editór: Xisto Freitas

Lee mós notísia ida ne’e: http://www.tatoli.tl/2019/07/km-aprova-deliberasaun-retensaun-ba-auto-estada-suai/

 

HAKEREK NO HATÁN

Please enter your comment!
Please enter your name here