Diretór Jerál Autoridade Aduaneira (AA), José António Fátima Abílio,Imajen/Egas Cristovão

DILI, 15 jullu 2019 (TATOLI)- Diretór Jerál Autoridade Aduaneira, José António Fátima Abílio, dehan, sira nia parte sei kontinua halo hela investigasaun ba kazu membru Alfándega sira ne’ebé deskonfia envolve iha kazu fasilita droga tama sai Timor Leste.

“Investigasaun sei la’o hela, tanba ita haree kona-ba buat ida ai moruk droga ne’e la’ós buat ida fasil atu ita deteta lalais, ai moruk ne’e mai rede ida ne’ebé forte tebes  no ita mós presiza rekursu para bele deteta,”  informa José António, ohin,  ba jornalista iha Igreja Motaél Dili.

Nia dehan, Alfándega sei kontinua halo serbisu atu prevene ai moruk aat ne’e labele tama sai hodi halo fali Timor Leste sai hanesan fatin tránzitu.

“Ita sei halo serbisu makas para bele prevene, agora ida kaer ona ne’e klaru nia hola parte ida ne’ebá ita sei haree ninia envolvimentu ne’e, tanba ema selu ka oinsá ita sei haree didi’ak halo analiza didi’ak para bele foti desizaun ida ba membru sira,” José António hateten.

Prosesu investigasaun ne’ebé parte Alfándega halo ba membru la’ós ba ema na’in ida ka rua de’it, maibé investigasaun jerál ba membru hotu- hotu ne’ebé iha altura loron kuarta (29/05/2019) uza mákina raiu-x hodi la konsege deteta  kazál timoroan  (JSP ho AS) lori ai moruk droga hamutuk 1.861 kilograma tau iha mákina impresora mutin tipu EPSON A4 lori sai husi Timor Leste ba Indonézia.

Antes ne’e, Komisáriu Komisaun Funsaun Publika (KFP) ba Asuntu Dixiplinár, António Freitas dehan, sira nia parte hein nafatin relatóriu investigasaun husi Alfándega ba kazu ne’e hodi foti desizaun tuir lei funsaun publika nian.

Jornalista :  Eugénio Pereira  

Editór       : Francisco Simões

 

HAKEREK NO HATÁN

Please enter your comment!
Please enter your name here